Ia Dom lah xã n’har bri geh âk kônh wa rnoi mpôl đê̆ bah nkuăl Đức Cơ, n’gor Gia Lai. Bah năp nơh, tâm ndrel ba kơi jêh Tết ri ăp năm kơt nê mro, rmôt dân quân tự vệ bah xã ndrel rmôt mât njrăng êng bah ăp thôn, ƀon tâm xã kŏ râng đah cán bộ, tahen biên phòng hăn mêt uănh, mât nau đăp mpăn tâm lam nkuăl n’har bri. Bu ranh Rơ Châm Tik, bah rmôt mât njrăng n’gâng n’har bri, ƀon Mok Đen 1, xã Ia Dom, mbơh, Tết đah kônh wa lơn ma geh nau ueh rnôk ma ƀư ăp nau kan nsum bah ăp tahen tâm nkuăl n’har bri:

            ‘Gâp bonh đă ƀon lan xã n’har bri tâm njêng đah ăp tahen Biên phòng. Phung hên ndrel tâm rgop ƀư nau ntrŭnh mât n’gâng n’har, jao ân rmôt mât njrăng êng năn saơ ăp nau kan hôm nkol ê dơi tâm nkuăl n’har bri gay ma năn mbơh ân tahen Biên phòng rklaih kơl an”.

            Tâm xã n’har bri Ea Bung, nkuăl Ea Súp, n’gor Dak Lak, Tết năm aơ lơn ma geh nau ueh rnôk ma văng sa geh nau hao, nau geh bah ƀon lan hao lơn ndrel nau tâm rnglăp bah ƀon lan lơn ma ueh. Wa Hoàng Thị Hằng, Kruanh rmôt ƀon lan kan lŏ mir xã Ea Bung, mbơh, ăp nau kan lŏ ndrĭch têh tăm ba kah, âk, rong ndrôk âk mô lah rong ka thác lác gay ma tăch ma cán bộ, tahen biên phòng mbơh, ntĭm ndrel kơl an ăp thôn, ƀon ntrŭnh nau leo nsĭt nau săk geh âk. Năm rlau aơ, kônh wa tâm xã hŏ ndâk geh nau tăm ba ndrel ntơm bôk năm mhe mra ndâk rmôt mât rong ka. Aơ lah ăp nau leo trong gay kônh wa nkuăl n’har bri Ea Bung hun hao lơn ăp ntil ndơ rgum, nâp ndrel săk tam:

            ‘Ăp đồng chí biên phòng sĭt ta aơ ntĭm trong jêh ri ndâk ân kônh wa ăp nau kan tuch tăm, mât rong. Bol ma knŭng ntĭm nti ân du thôn ri geh đê̆ nŭih dơm, yơn lah rnôk sĭt ri kônh wa kŏ nkoch mbơh, ƀư kơt âk, kơt dŏng nau kan khoa học, tuch tăm, ƀư ueh ngăn. Lah nsum lah kônh wa saơ moh ndơ ueh âk ri kơt tĭng, hăn tâm di trong ri kônh wa rhơn ngăn”.

            Tết năm aơ tât ơm, ri ma rnăk wa Y Phương, ƀon Đăk Boi, nkuăl têh ĐăkGlei, nkuăl n’har bri Đăk Glei, n’gor Kon Tum kŏ pah kan âk lơn ăp năm. Nkre rôk bum blang năn tăch ân ngih máy ê nkra, rnăk vâl lŏ rep ngih vâl. Năm aơ geh prăk tăch ndơ tuch tăm, rnăk wa dŏng gay nkra tay ngih. Uănh kon se geh kho ao mhe sa tết nchuăt pâl ri ma nau ueh bah rnăk wa Phương tâm kêng măng dŭt năm lơn ma ueh. Wa Y Phương rhơn nkoch, rnăk wa hŏ nchrăp ndơ sa, dak ngêt ngăn lah ăp ntil ndơ sa bah rnoi Xơ Đăng gay ma rhơn tết, rhơn năm mhe:

            “Rơh rlau aơ nchrăp nau vơt năm mhe kŏ lah rnôk ma rnăk hên hŏ lôch kăch ba, anh ba leo nsĭt tâm ngih. Ba geh nklăp 70-80 bao. Vơt năm mhe ri hên gŭch sur, prung piăng. Jêh rnôk nchrăp ăp ndơ sa vay ơm, ôp brah yang kơl an rnăk nơm tât năm mhe geh n’hâm soan, pah kan jan sa blau. Jêh nê, rhơn ngăn lah rnôk bu ndăm tur chĭng, njroh mprơ, ăp nŭih tâm rnăk vâl ndrel ngêt ndrănh yăng, sa ăp ntil ndơ sa kah bah rnoi nơm”.

            Vơt năm mhe, nau ueh bah năm mhe kŏ rêng lam ăp đồn biên phòng tâm Tây Nguyên. Đah cán bộ, tahen grat ndrih, Đồn lah ngih, nkuăl n’har bri lah ƀon lan, sa tết tâm đồn kŏ kơt lah tâm ngih. Bah mpang ty jăp blau bah cán bộ, tahen, ăp nklâm ƀănh chưng geh nchrăp ân nar tết ueh ngăn. Ndơ sa geh nchrăp êng, mra geh tă bah mir nơm tăm, mro kloh, ndrih ndrel tŏng nau ŭch tâm tâm rnôk tết. Thiếu tá Lương Văn Phú, Chính trị viên phó Đồn Biên phòng Đắk Tiên, N’gâng kan rđau tahen Biên phòng Dak Nông mbơh, rmôt kan hŏ ƀư ueh nau mĭn ndrel cán bộ, tahen kŏ đăp mpăn rhơn vơt năm mhe, vơt tết:

            ‘Nuih n’hâm bah ăp nŭih ƀư nau kan bah tahen rnôk aơ lah nau rhơn ngăn, ndrel hŏ nchrăp ăp ntil nau geh jêng gay ma vơt tết. Ăp nŭih tahen hŏ nchrăp nau mĭn rjăp gay ma ƀư nau kan geh jao”.

            Kŏ kơt lah âk Tết êng êng, Tết Quý Mão năm 2023 aơ bah rmôt Biên phòng bah ăp n’gor Tây Nguyên mhe vơt tết, rhơn năm mhe, nkre djăt ăp nau tât bah nkual n’har bri gay ma nkân uănh bah ăp rmôt tahen geh ntrŭnh ƀư. Ăp nau kan mât nau ƀư tơm geh ƀư, mro. Rnoh nŭih bah ăp Đồn rmôt tahen mro kâp njrăng ndrel mra ƀư ăp nau kan geh jao. Nau kan mêt uănh, nkân njrăng nŭih, ndeh klư luh lăp nkuăl n’har bri geh ƀư ueh, gay rgop nau mât, njrăng nkuăl n’har bri, n’gâng n’har ndrel nau ƀư tơm bah neh dak. Thượng tá Phạm Đức Khá, Chính trị viên Đồn Biên phòng mpông đah dak ba dih Đăk Ruê, Tahen Biên phòng n’gor Dak Lak, mbơh:

            ‘Đảng uỷ, Rđau kan rmôt tahen phung hên hŏ geh nau ntrŭnh rđau, Rđau đă bah rmôt kan hŏ ndâk nau nchrăp đăp mpăn geh tŏng nŭih mra dơi tâm lơh, pă nau kan bah cán bộ, tahen râng ăp rmôt, ăp ntŭk tâm nkual n’har bri, ngăn lah ăp nkuăl tơm. Gay mhâm ƀư tâm rơh tết ân geh rgum ngăn, đăp mpăn ân nkuăl n’har bri geh đăp mpăn. Di rnôk năm mhe, dăn njoăl tât dĭng lĕ ƀon lan tâm nkuăl n’har bri bah lam dak geh du năm sa Tết ueh lăng, tâm rnglăp, ndrel đăp mpăn. Đah ma hên nơm, ăp tahen nkuăl n’har bri ton mra ƀư uhe nau kan, tâm rnglăp, kuăn nâp n’gâr phao gay ma mât nâp nkuăl n’har bri bah neh dak”.

            Nkuăl Tây Nguyên geh 586 km đah n’har dak ba dih, hăn rlet rlau 32 xã nkuăl n’har bri, tâm 13 nkuăl, bah 4 n’gor geh Kon Tum, Gia Lai, Dak Lak ndrel Dak Nông. Du năm mhe lŏ tât, nau nsôih, nau nchrăp ƀư nau kan bah ăp cán bộ, tahen grăt ndrih hŏ ndrel dôl rgop nau khlay gay mât đăp mpăn, rnă njrăng nau rêh jêng tâm nkuăl n’har bri. Ngăn lah tâm rnôk tết aơ, nau nâp nâl bah ăp nô hŏ leo tât nau đăp mpăn gay ƀon lan vơt tết./.