Tổng Bí thư, kruanh dak Tô Lâm râng n’hanh ntoh ngơi ntĭm đă ta rơh Đại hội. Sĭt râng Đại hội geh 1.052 đại biểu ndơn kan an ăp nuĭh ƀon lan , ăp rơh nuĭh, ăp mpôl rnoi, phung chroh, mpôl tahen, nuĭh Việt Nam ta dak bah dih n’hanh cán bộ Mặt trận ăp gâl, mpơl nău rup ueh ntoh lư bâh rmôt kan tâm rnglăp lĕ mpôl rnoi. Đah nău ŭch n’hao tay nău way ơm, soan tâm rnglăp lĕ mpôl rnoi, năm kan 2024-2029, Đại hội ngluh mbơh 6 bôk nău pah kan geh: Ntrôl dăng nău kan mbơh tơih, rgŏ jă, rgum ăp nuĭh ƀon lan, n’hao nău tâm ban ta ntŭk rêh jêng, n’hao soan dăng tâm rnglăp mpôl rnoi. N’hao nău dơi kan, săk rnglăy pah kan uănh nđôi n’hanh mbơh tơih ta ntuk rêh jêng, ƀư tĭng ƀon lan ƀư tơm, tât râng rdâk njêng Đảng, ngih dak. Rgŏ jă ăp nuĭh ƀon lan tâm rlong, mĭn kan, ƀư tĭng geh săk rnglăy ăp rơh rgŏ jă, nău tâm rlong. N’hao nău ƀư tơm, nău mât kan êng bâh ƀon lan, rdâk njêng nkual ƀon lan tâm rnglăp, hơm răm, đăp mpăn. N’hao nău săk rnglăy pah kan cnhră nău đah ƀon lan n’hanh nău kan nuĭh Việt Nam ta dak bah dih. Rgâl mhe tay nău leo kan, nkô̆ nău, trong pah kan, rgŏ jă n’hao nău dơi mpôl cán bộ măt trận ăp gâl.