Rơh hop tâl 4, Quốc hội khóa XV ntơm pơk rgum ôi aơ 20/10 ta Hà Nội n'hanh nchrăp lôch jêh tâm nar 15/11/2022. Tĭng bôk nău kan, ôi aơ đại biểu Quốc hội an kao si n'hanh Lăp Lăng weh chop Kruanh Hồ Chí Minh lor rnôk lăp rơh hop nchrăp lor gay tâm nchră n'hanh n'hơr ti  uănh an dŏng bôk nău kan rơh hop tâl 4, Quốc hội khóa XV. Rơh hop ntơm pơk ngăn tâm rnôk 9h ôi ta Hội trường Diên Hồng - Jay Quốc hội (Hà Nội) n'hanh dơi pơk ƀoh sŏng dăng gay cử tri n'hanh ƀon lan tĭng groi nđôi.

Ta rơh hop dja, Quốc hội mbra mĭn uănh, an dŏng 7 trong nchrăp Luật: Luật Dầu khí (rgâl nkra); Luật Njrăng n'gang tâm lah tâm rnăk wâl (rgâl nkra); Luật Thanh tra (rgâl nkra); Luật Tĭng ƀư geh nău tâm ban tâm dâng; Luật rgâl nkra, nkoch ntop du đêt nkô̆ bah Luật Tần số vô tuyến điện; Luật But săm ji (rgâl nkra); Luật njrăng n'gang rao prăk (rgâl nkra); Nghị quyết an dŏng Nội quy rơh hop Quốc hội (rgâl nkra). 3 trong nchrăp Nghị quyết dơi uănh an dŏng đŏng, lah: Nghị quyết mpeh rlong pă an nău dơi sơch dŏng biển số ô tô ma rơh tâm rlong khlay; Nghị quyết mpeh rlong ƀư du đêt nău way kan, trong kan mha êng hun hao nkual ƀon têh Buôn Ma Thuột, n'gor Dak Lak. Bah meng nê, Quốc hội mbra ƀư nău kan groi nđôi gưl têh; mĭn uănh, n'glêh an ăp nkô̆ nău wăng sa- rêh jêng kon nuĭh n'hanh du đêt nkô̆ nău khlay êng ƀa ƀă bah neh dak./.

VOV/Nuĭh rblang: Điểu Thân