Khay 11 năm 2021, Trung ương Hội Liên hiệp bu ur Việt Nam tâm rgop đah Ủy ban Dân tộc ƀư mât uănh, mbơh tơih ƀư tĭng bôk nău kan tât 51 n’gor, nkuăl ƀon têh lah nkual ƀon lan rnoi đê̆ n’hanh gôl yôk. Nău nchrăp kan “ƀư tĭng tâm ban bu ur bu klô n’hanh doh rklaih ăp nău ngăch ndal đah bu ur n’hanh oh kon se” lah ngoăy tâm 10 nău nchrăp kan bâh ta bôk nău kan nkô̆ mpŏng ngih dak hun hao wăng sa rêh jêng nkual rnoi đê̆ n’hanh gôl yôk lvang năm 2021-22030. Nău nchrăp kan yor trung ương Hội Liên hiệp bu ur Việt Nam geh jao leo kan rdâk njêng n’hanh mbơh tơih ƀư tĭng nău kan. Aơ lah rơh bôk năp tâm rnoh bôk nău kan nkô̆ mpŏng ngih dak hun hao wăng sa rêh jêng nkual rnoi đê̆ n’hanh gôl yôk geh êng du nău nchrăp kan mpeh nău ntrôl an tâm ban bu ur bu klô.

Trung ương Hội lĕ ntrôl dăng mbơh tơih ăp nău pah kan mbơh tơih naư mhe mpeh nău nchrăp kan 8 bâh ăp nău kan mbơh tơih nău mhe, tâm nchră ta ăp ntŭk kan ntoh ngơi ntoh rup. Tâm rgop đah ăp n’gâng kan, ntŭk kan geh tât ƀư tĭng nkô̆ nău, nău mpŏng kan bâh nău nchrăp kan 8 geh tât nău dơi, nău kan bâh n’gâng kan.

Ta meng ăp nău pah kan kơl an bâh Trung ương hội, Hội Liên hiệp bu ur ăp gâl kan ta ăp ntŭk lĕ geh rgum ƀư mbơh tơih ăp nău pah kan ta 8 xã ntĭm đă nău kan tơm, lĕ geh njêng n’hanh mât nău kan geh 32 nău kan mbơh tơih ta ntŭk rêh jêng, 4 ntŭk geh nău knơm, 4 câu lạc bộ leo kan bâh nău rgâl mhe n’hanh leo kan geh 4 rơh tâm nchră nău kơl kan. Mât uănh, leo ƀư ăp nău pah kan ntĭm nti uănh n’hao nău dơi an cán bộ bu ur rnoi đê̆. Nti nău kan, ntĭm leo uănh nđôi, uănh năl mpeh tâm ban bu ur bu klô, n’hao nău dơi ƀư ndrel mpeh mbơh tơih bu ur bu klô an cán bộ nkuăl, xã n’hanh thôn ƀon.

Tĭng nău mbơh bâh wa Trần Lan Phương, groi kruanh Hội liên hiệp bu ur Việt Nam, lôch 3 năm mbơh tơih ăp nău pah kan mbơh tơih, n’hao nău dơi an cán bộ bu ur rnoi đê, n’hao nău dơi pah kan ndrel mpeh mbơh tơih bu ur bu klô an cán bộ ta trong kan chính trị, ăp bu ranh ƀon, kruanh ƀon, nuĭh geh knơm ta ntŭk rêh jêng n’hanh ƀư tâm nchră nău kơl kan gâl xã n’hanh ta thôn ƀon lĕ geh ăp n’gâng kan, ăp ntŭk kan n’hanh Hội liên hiệp bu ur ăp n’gor pă dăp mbơh tơih an tâm ban, kơl an ta ăp xã kan tơm.

"Ăp nău pah kan ntĭm đă bôk năp lĕ geh njêng nău rgâl mhe ueh tâm nău gĭt vât, nău kan bâh nuĭh ƀon lan, tâm rgop rgâl nău mĭn trong kan, jut jăng nău tâm nglah tâm mưch bu ur bu klô n’hanh bah ir geh nău tât bâh ăp ntŭk rêh jêng ngăch ndal đah bu ur n’hanh oh kon se”.

Wa Lò Thị Thu Thủy, Ủy viên mpôl Kruanh, Kruanh Ban Dân tộc - phung chroh, Trung ương Hội Liên hiệp bu ur Việt Nam an gĭt, ăp ntŭk kan bâh Trung ương Hội lĕ geh rdâk njêng ăp ntil săm ƀŭt ntĭm leo njêng kan, leo kan n’hanh ăp ntil săm ƀŭt kơl an nău kan mbơh tơih, leo kan tâm mâp rgum bâh ăp nău pah kan. Ngăn lah ăp nău kan Câu lạc bộ “Nuĭh leo kan bâh nău rgâl”. Ƀư nchih ăp rnoh mbrô đah ntil video, rup nkoch, dŭt ueh, tâm di đah ăp nuĭh.

"Bâh nău pah kan ntĭm nti nău kan, ntĭm n’hao nău dơi kan an cán bộ Hội n’hanh cán bộ ăp n’gâng kan geh tât gâl xã mpeh njêng, leo kan n’hanh n’hao nău ueh dơi pah kan bâh trong kan lĕ geh ăp Rnâng kan Trung ương Hội uănh khlăy ƀư tĭng ƀa ƀơ ăp năm. Nkre lah n’hao nău kơl kan kĩ thuật an ta ntŭk tât mât uănh sŏng dăng, leo kan ăp nău pah kan. Leo ƀư nău kan geh tât mbơh tơih ta ntŭk rêh jêng”.

Tĭng nău mbơh tơih bâh Ban Dân tộc- Phung chroh, Trung ương Hội Liên hiệp  bu ur Việt Nam, ăp nău pah kan bâh ăp n’gâng kan ta ăp xã lĕ rgum ta nău tâm nđur mbơh tơih nău tă kan gay ma rgâl nău mĭn, trong kan, jut jăng nău tâm mưch tâm nglah bu ur bu klô. Ta nău ntĭm mbơh bâh trung ương, ăp gâl kan lĕ rgum ta nău lăp kan ndrel bâh ăp n’gâng kan, ăp gâl kan mbơh tơih ăp nău kan geh săk rnglăy âk lơn.