Rlău 1 khay lôch rơh Festival kao Đà Lạt tal 9 năm 2022, rnoh năch sĭt ta nkuăl ƀon têh aơ ăp nar lơ ma âk. Ta ƀon kao Đa Thiện, ngoăy tâm 5 ƀon kao way ơm bâh nkuăl ƀon têh Đà Lạt, năch pâl nđaih geh hăn uănh tât ta ntŭk tăm pla n’hơ âk ntil kao ueh ntơr, ndrel đah ƀon lan kan lŏ mir tăm, mât chăm kao. Năch pâl nđaih Trần Thanh Hà, tât bâh nkuăl ƀon têh Hồ Chí Minh, nkoch mpeh nău tă gĭt ueh bâh nơm rnôk hăn pâl ta aơ.

“Saơ du nău nđơr rhơn ngăn, di lah nkuăl ƀon têh bâh nău tâm rŏng n’hanh lah nkuăl ƀon têh rbăn kao. An geh lah ăp ntil kao lah du nău ƀô kah êng, du mau êng, du ntil êng...n’hanh lĕ rngôch dŭt ueh ngăn n’hanh ntơr n’hanh dang dŭt ueh ang”

Ndrel đah ƀon kan Đa Thiện, ăp ƀon kao Xuân Thành, Vạn Thành, Thái Phiên, Hà Đông bâh nkuăl ƀon têh Đà Lạt lĕ geh mpla âk ntil kao ueh, mât đăp mpăn nău geh di gay ma kơl an năch pâl nđaih. Wa Vũ Anh Dũng, ta ƀon kao Hà Đông, phường 8, nkuăl ƀon têh Đà Lạt, an gĭt, ƀon lan nkuăl ƀon têh lĕ nkra mhe ueh trong hăn, n’hao nkra mhe ăp ntŭk pâl rlưn ndrel đah ăp ntil ndơ kao ơm geh ta ntŭk.

“Ƀon pah kan bâh mpôl hên lĕ geh ƀư ăp ntŭk pâl nđaih an năch tât khâl, pâl rlưn. Rnôk geh năch tât rĭ mpôl hên geh nuĭh ntĭm leo tât ăp ntŭk tĭng nău ŭch năch hăn. Nĕ lah năch ŭch hăn ta mir cao cúc rĭ mpôl hên ndơ̆ tât mir kao cúc, ăp mir kao ly, kao hồng rĭ lĕ geh nuĭh ndơ̆ hăn n’hanh ntĭm mbơh an năch hăn. An geh lah, nău mĭn kan bâh ƀon lan dŭt rhơn ngăn rnôk geh loe ƀư ăp ntŭk pâl rlưn ta ƀon tăm kao kơt aơ”.

Rnôk tât đah ăp ƀon kao, năch pâl nđaih mbra geh gĭt du nar pah kan ŏ r’ah bâh ƀon lan, joi gĭt nău tăm, mât chăm ăp ntil biăp, bum, play ntoh lư bâh Đà Lạt, nơm lêh êng ăp play dâu tây bŭm chăng, ndrel hăn đah nău rêh bâh nuĭh Đà Lạt. Rlău ma ăp ntŭk pâl rlưn ƀon kao geh ƀư ta aơ, ntŭk aơ hôm nha geh âk ntŭk pâl nđaih tuch tăm bâh ăp công ty, doanh nghiệp pâl nđaih pah kan ta aơ. Tĭng nău mbơh bâh wa Nguyễn Hùng Vỹ, ta ƀon kao Vạn Thành, nău ndơ̆ ăp ƀon kao way ơm, ăp ntŭk pâl rlưn tuch tăm lăp pah kan vơt năch lĕ pơk trong du nău rêh ueh ang an nuĭh ƀon lan ta ntŭk. Yor ăp ntil ndơ ueh bâh ƀon lan kan lŏ mir mbra geh ƀư âk nuĭh joi gĭt n’hanh gĭt tât, bâh nĕ n’hao nău ntơ, rnoh khlăy ndơ tuch tăm n’hanh nsĭt tay nău geh đăp mpăn lơn. Ta meng nĕ, âk năch veh chop mbra geh nkre ăp ntil nău kan hun hao êng. Wa Nguyễn Hùng Vỹ ngơi.

“Pâl nđaih tuch tăm ta ƀon tăm kao Vạn Thành rĭ dôl hun hao dŭt ueh ngăn, nsĭt tay săk rnglăy wăng sa dŭt têh. Nkuăl ƀon têh lĕ dôl ntrŭt đă, nta nău dơh nơih dŭt n’hâm an ƀon lan tăm kao tâm ban kơt ăp doanh nghiệp ta ntŭk hun hao tĭng trong pâl nđaih tuch tăm. Nkre tâm rgop đah pâl nđaih nkre pah kan jan sa ndơ geh ƀư, nău ntrŭnh aơ gâp saơ dŭt geh săk rnglăy ngăn”.

Tĭng nău mbơh bâh wa Tôn Thiện San, kruanh UBND nkuăl ƀon têh Đà Lạt, ta rơh Festival kao Đà Lạt tal 9 n’hanh tết Nguyên đán aơ, ta ntŭk geh ƀư bôk nău kan “Đà Lạt-Pâl nđaih ăp ƀon pah kan”, gay ma mbơh tơih, mbơh n’gơ nău ntơm njêng, nău ueh nkual neh, kon nuĭh bâh ăp ƀon tăm kao way ơm đah năch pâl nđaih. Aơ lah rơh gay ma năch ntrŭt jă, ăp doanh nghiệp, nuĭh ƀon lan ta ăp ƀon tăm kao an geh ntrôl nău tâm rlong pah kan jan sa, ntuh kơl hun hao tuch tăm ndrel đah hun hao pâl nđaih. Wa Tôn Thiện San an gĭt, mpeh jŏ jong let năp tay, nkuăl ƀon têh mbra nchrăp nău kan na nê̆ ntil nău pâl nđaih aơ gay ma n’hao an săk rnglăy nău wăng sa rêh jêng.

“Ăp ƀon tăm kao pah kan kanŭng lah njoat ntơm hăn, mpôl hên dôl geh ƀư tĭng nău nchrăp ƀư tay ăp ƀon tăm kao, rnôk nău nchrăp geh an dŏng rĭ mbra geh ƀư ndâk njêng ăp nău kan tĭng ƀon kao nĕ. Năp lor ăp ƀon tăm kao hôm nha geh ntil ndơ ƀư dŏng, ntĭt kơt ƀon tăm kao Vạn Thành aƀaơ dŭt âk năch n’hanh mbra dơi geh tât râng pâl rlưn ta măng. Ta meng ăp doanh nghiệp lĕ ntuh kơl hôm rĭ, nkuăl ƀon têh mbra kơl mbơh nău, kơl tay prăk kan gay ma mpoh tay ŭnh ang jêng ăp trong kao hăn ueh mbra dơi hăn nsong ta măng”.

Đah ăp nău nchrăp kan tâm nău nchrăp nău kan, nkre lah ntrôl dăng nău pah kan dŏng khoa học kĩ thuật ta nău tuch tăm, knơm an lah ƀon tăm kao way ơm bâh nkuăl ƀon têh Đà Lạt mbra geh hun hao têh dăng n‘hanh nâp nâl, ƀư ueh tay nkual neh rbăn kao.