Ơi kônh wa ndrel băl mpôl. Nau pâl n’aih dak nơm ntơm pơk tay mpông tĭng nau kan ntơm lơ 15/3/2022 ndrel ndâk ngăch tâm ăp nkuăl tơm. Tĭng nau mbơh bah N’gâng kan Văn hoá, Thể thao ndrel Pâl n’aih, tâm năm 2022 mhe rlau geh 3 rkeh n’gul tŏ nŭih năch tă bah dih tât Việt Nam, năch tâm dak geh 101 rkeh tŏ (rlet rlau n’gul rđil đah nkô̆ nau nchrăp bôk năm. Năm 2023, ntŭk kan pâl n’aih Việt Nam leo nkô̆ nau nsôih vơt 110 nŭih năch pâl n’aih, tâm nê geh nklăp 8 rkeh năch dak ba dih, năch tâm dak nklăp 102 rkeh tŏ, rnoh geh bah nau kan pâl n’aih nklăp 650 rbăn rmen. Ntŭk kan pâl n’aih mra rgum tâm ăp nau kan tơm kơt lah ntrŭnh mbơh “Nau rgum ntrong kan pâl n’aih Việt Nam lvang năm 2021-2030, rƀŏng tât năm 2045”. Ntrŭnh ƀư nau kan makerting pâl n’aih Việt Nam tât năm 2030, Bôk nau kan “Dŏng nau kan bah công nghiệp 4.0 gay hun hao pâl n’aih mhe, ntrŭt dăng nau pâl n’aih jêng nau văng sa tơm”, Bôk nau kan hun hao pâl n’aih nsum mpôl Việt Nam...

          Lôch bah nuh srê COVID-19, năm 2022 trong kan pâl nđaih bah n'gor Kon Tum dâk hao tay dăng, lam n'gor hŏ wơt 1,1 tơ̆ rkeh năch pâl nđaih. Lĕ rngôch nsĭt geh bah rhŏ dŏng pâl nđaih rlău 265 rmen prăk, hao rlăy 3 tơ̆ rđĭl đah năm bah năp nơh. Năm mhe 2023 n'gor Kon Tum nsrôih wơt 1,3 rkeh tơ̆ năch pâl nđaih tât n'gor. Lah nuĭh lor bôk năp ta ƀon Kon Pring, thị trấn Măng Đen, nkuâl Kon Plông râng ƀư pâl nđaih nsum mpôl tâm ƀon lan, yuh Y Lim an gĭt, ăp nău kan văn hóa tă bah nkuâl ƀư tâm năm 2022, kơt Lễ hội kao anh đào, Lễ hội Tết way ơm, Bôk nău kan nchreng uănh ndơ cheh tanh Tây Nguyên…hŏ wăch rgum hang rmưn năch pâl nđaih tât đah nkuâl. Yuh Y Lim rhơn ta năp ăp nău dơi geh nău kan tăch rgâl pâl nđaih nsum mpôl tâm năm bah rnăk wâl n'hanh n'gluh nău mpŏng tâm năm mhe 2023:

"Gâp way ŭanh khlay nău mât ndray n'hanh mpư n'hao săk tơm văn hoá way ơm bah rnoi nuĭh he nkre đah pâl nđaih nsum mpôl tâm ƀon lan, mô dơi an săk tơm văn hoá geh roh hêng. Gâp rblang an kônh wa wât kloh ta ntŭk lah mhâm ƀư pâl nđaih bah tơm nsĭt geh wăng sa, ƀư lŏ, ƀư mir mhât nsĭt geh wăng sa. Ntơm bah nê, he tâm rđĭl mpeh nău rĭng geh wăng sa tâm năm, ƀư mir ba dŭt ŏ r'ah ma nsĭt geh wăng sa dŭt đêt, ƀư pâl nđaih ri tâm du khay mbra nsĭt geh 10- 20 rkeh prăk. Kônh wa he ân kơt nti tay trong ƀư pâl nđaih, gĭt kơp nđăp, ƀư ăp nău kan geh nsĭt mpeh wăng sa an săk nơm n'hanh rnăk wâl. Jêng, kônh wa he  nsrôih ƀư pâl nđaih gay hun hao wăng sa rnăk wâl, kơl muh măt thôn ƀon nar lơn ma hun hao".

          Nglau Ayun Hạ xã Chư A Thai, nkuăl Ayun Pa mô knŭng lah ntŭk trong dak kơl an nau kan tuch tăm, mât rong tui ka, ma aơ lah ntŭk pâl n’aih geh âk năch tât. Đah rnoh nglau hvi 37km2 nglau Ayun Hạ ueh ngăn tâm rnôk yan vai, kŏ lah rnôk Tết năm mhe. Nglau Ayun Hạ dŭt n’hâm ueh rnôk ma pĭt meng geh tăm âk tơm si ndrih jêng. Yuh Villa (rnoi Jrai) gŭ tâm xãIa Sol, nkuăl Phú Thiện, n’gor Gia Lai ŭch ngăn mpeh ntŭk pâl ueh bah ƀon tơm nơm. Yuh mbơh, rnôk tât Ayun Hạ, bu năch ri geh pâl âk ntŭk ueh:

          “Rnôk ncho duk tâm nglau, uănh ueh dak nglau, tơm si êp nglau ri dŭt n’hâm ŭch ngăn, màu ndrih bah tơm si, vbah dak rsang ngar. Năch tât pâl n’aih ri bu hăn joi rvăt sa tâm nglau đŏng, tâm nê geh âk ntil ka kah ngăn. Ncho duk tâm nglau gay ma uănh pâl ri dŭt n’hâm ueh tâm nuih n’hâm bôk rnglok. Nglau dak tă bah Ayun Hạ hoch tât ăp trong mương, leo n’hoch ân ƀon lan ƀư lŏ 2 yan. Nglau dak Ayun Hạ kơl an kônh wa ƀon lan tâm ăp nkuăl Phú Thiện, nkuăl têh Ayun Pa, mô lah hoch tât Krông Pa kŏ geh đŏng. N’gor Gia Lai kŏ dôl ma joi tơm prăk gay ma ntuh kơl, ndâk nkra, ƀư nâp nglau Ayun Hạ gay ma pơk hvi ăp nau kan pâl n’aih gay ma njêng nau ueh ân ƀon lan geh dơi hun hao văng sa”./.

VOV Tây Nguyên/Nuĭh rblang: Điểu Thân n'hanh H'Thi