Bol ma neh 3 ha, tâm xã Gào, nkuăl ƀon têh Pleiku, bah wa Lê Sỹ Đại (gŭ tâm Hà Tĩnh) dôl geh tâm neh rgum ƀư tăch rgâl dŏng kan, yơn nŭih tơm neh hŏ ndâk tih dôih du ntŭk kan geh 4 ngih kđar, 4 nlâm nthưp ndrel bơi tât 10 ngih nâp nâl đah ntrong tŏ bê tông nâp...Bah nau ndâk ntơm năm 2020 tât rnôk aơ, UBND xã Gào hŏ ndâk 2 nau ntrŭnh mhal tih hành chính geh nsum ma nau ntop đă ndâk tay nâm ơm neh. Yơn lah, jêh ăp tŏ ntrŭnh nau mhal, wa Đại lŏ ndâk ntop tay. Mhe aơ, wa Dương Xuân Hồng, Groi Kruanh UBND xã Gào mbơh hŏ njoăl săm ƀŭt tât UBND nkuăl ƀon têh Pleiku, đă nchâp ƀư:

‘Tâm rnôk rklaih, UBND xã kŏ ntơm ƀư nchih săm ƀŭt mham, rklaih mhal, đă UBND nkuăl ƀon têh luh nau ntrŭnh mhal. Du đê̆ tŏ UBND xã jă pah kan, yơn tơm neh mbơh lah mô geh măt tâm nkuăl, ri ma mô geh dơi mâp ôh, hăn tât ta ntŭk ri kŏ mô geh dơi mâp, rnôk hăn mêt uănh kŏ mô geh nŭih pah kan, mô geh mâp nŭih tơm ngih”.

Tâm ban ma nê, ta Tổ 5, Phường Thắng Lợi, nkuăl ƀon têh Pleiku, wa Vũ Trung Anh ndrel ăp rnăk êp nê kŏ ndâk ngih tâm neh tuch tăm. Tât rnôk aơ, ntŭk ƀư tih geh bơi tât 300m2 neh, geh âk ngih, mpir ngih. Mhe aơ, tĭng nau mbơh bah ƀon lan, UBND nkuăl ƀon têh Pleiku saơ tâm nkual neh tuch tăm êp trong Tô Vĩnh Diện, Phường Hoa Lư. Wa Nguyễn Văn Tùng, Kruanh UBND Phường Thắng Lợi mbơh, âk nkŏ nau ƀư tât nau mô năn saơ, lah saơ ri jêr rklaih lĕ ăp ntŭk ndâk nkra. Tâm nê, nkô̆ nau tơm mpeh nau dơi bah cán bộ tâm dâng ndrel ăp nkô̆ nau êng tă bah nau rŏng ma ƀư tih bah ƀon lan.

 ‘Mông ri mô rlau 24 mông ntơm bah rnôk nchih săm ƀŭt mhal ân geh njoăl nau đă. Yơn đă ri điều khoản mô tâm rnoh nsum nsum, mpeh ba kơi lŏ njoăl tât ba dâng ri mô hôm năn. Du hê nŭih tih, yơn nơm ƀư âk tŏ, jêr ngăn ân ma Phường, tâm rnôk nau kan kŏ âk, cán bôk mâp kan ri jêr, pháp luật ri rgâl mro. Nau mĭn bah nŭih ƀon lan dôl ma kâp rnơm, lŏ geh du gưl đŏng lah nau rdâng, bu hôm tĭng nau mĭn kăl e, khân păng nchŏk mbơh ntŭk aơ, ntŭk êng gay ma tâm ntit”.

  Tĭng nau mbơh bah UBND nkuăl ƀon têh Pleiku, ntơm lơ 1/1/2020 tât 31/8/2022, tâm xã geh 84 nau tih hành chính mpeh neh ntu, ndâk nkra geh mhal, ndrel nchâp đă ndâk tay neh kơt ơm. Yơn tât rnôk aơ, knŭng geh 42 nau kan geh rklaih lôch. Wa Mai Văn Hoàn, Kruanh jrâu kan Tài nguyên ndrel Môi trường nkual ƀon têh Pleiku mbơh:

    ‘Ta aơ, ndŏ luh nau mât nau kan bah nkuăl. Ngăn lah, ăp xã, phường, bu gĭt da dê, yơn lah du đê̆ mô geh njrăng uănh. Bôk năp, bu ntôn lah ƀư ngih đê̆ đă, yơn rnôk saơ ri hŏ têh hôm. Rnôk nê rlet rlau ma nau dơi, ntrơn tât nkuăl ƀon têh, UBND nkuăl ƀon têh ƀư jao nau kan ân Kruanh UBND xã phương, bu lŏ mô geh ŭch kơl an ngăn ôh nau kan aơ”.

Tâm rơh rƀŭn tal IX, Hội đồng nhân dân n’gor Gia Lai gưl XII (năm kan 2021-2026) mhe rlau, ôp mpeh nau tih rnôk ndâk ngih tih dôih tâm neh tuch tăm, du đê̆ ntoh măt mbơh nau: Âk ngih ndâk têh, geh ndâk jong khay, yơn nau saơ năn mô mô geh, rklaih mô rjăp. Tât rnôk jêh bu nkra, nchâp đă bu rơih ri mra lơh khuch tât tơm prăk ƀon lan. Ơh nau mpeh nau aơ, wa Lương Thanh Bình-Groi Giám đốc N’gâng kan ntŭk ntu gŭ âm Gia Lai, mbơh:

  ‘Nau kan mât tơm neh aơ tâm ăp nkuăl, du đê̆ nau kan ngăn lah bah UBND ăp nkual. Mpeh nau kan bah ntŭk kan, gay ma ƀư nâp, rklaih ăp nau nkol mbơh ba lơ nê, N’gâng kan ntŭk ntu gŭ âm hŏ kơl mbơh nchră nau ân UBND n’gor. Tĭng nê, UBND n’gor hŏ rđau đă ăp ntŭk kan geh tât ndrel ăp nkual, ntrŭt dăng nau kan nkoch mbơh, ndrel nsôih rklaih ăp nau tih”.

  Gay n’hao nau mât nau kan ndrel ƀư nâp nau rgâl nau kan mpeh nau tih bah neh ntu, nklang năm 2022, UBND nkuăl ƀon têh Pleiku hŏ ndâk ăp rmôt ƀư nau kan tĭng nkô̆ mpeh nau kan ndâk nkra, neh ntu tâm ăp xã, phường geh âk ntŭk ntih vâl hôm ƀư tih, lơh ji nuih tâm ƀon lan. Nchrăp tât bôk năm 2023, nkuăl ƀon têh mra mbơh n’hêl mpeh ăp nau tă geh bah nau mhal ăp ntŭk geh ndâk tih dôih ndrel rklaih nau kan bah ăp rđau kan ăp xã mô tŏng nau ƀư tâm dăch, gay geh jêng nau aơ jŏ tât jŏ jong./.