Nar 9/12, Groi Thủ tướng Trần Hồng Hà hŏ ƀư tơm rơh hop đah ăp Bộ, ndrel nkual ƀon têh Hồ Chí Minh, n’gor Long An, Tiền Giang mpeh nău gŭ mĭn ntuh kơl pơk hvi trong cao tốc nkual ƀon têh Hồ Chí Minh - Trung Lương - Mỹ Thuận.

Tâm rnôk tơm prăk ngân sách mô dơi tâm rlak geh tâm ban gay ntuh kơl ƀư trong cao tốc dja, nkre tĭng ƀư trong nchrăp lam mpôl rgop nsum, Bộ Giao thông Vận tải kan nsum đah Ủy ban Nhân dân n’gor Tiền Giang mbơh n’hanh dơi Groi Thủ tướng ŭch dơn jao an Bộ gŭ mĭn ntuh kơl pơk hvi trong cao tốc Nkual ƀon têh Hồ Chí Minh-Trung Lương-Mỹ Thuận tĭng trong ƀư PPP (ntuh kơl tĭng trong bah dih tâm trôm ngih dak) lam njăr trong. Tĭng nê, rnoh jong lam njăr trong nklăp 91km, hvi 6- 8 mbor ndeh, tâm di đah dĭ trong hŏ dơi đă ntrơn du. N’glôch jêh rơh hop, Groi Thủ tướng Trần Hồng Hà jao an Bộ Giao thông Vận tải mbơh ăp tŏng rêng rnôk an ƀư pơk hvi tay trong cao tốc Nkual ƀon têh Hồ Chí Minh-Trung Lương-Mỹ Thuận tâm bah ri aơ nơh; mĭn uănh, ntĭm nti ăp n’gâng kan ta ntŭk sơch tơm nuĭh ntuh kơl tĭng quy định mhe mpeh ntuh kơl ntơm bah nar 1/1/2025, trong plơ̆ trok tay drăp ndơ jêng luh bah tơm prăk ntuh kơl gay rdâk njêng trong cao tốc.