Ê lor dăn rhơn ân n’gor Dak Nông tă geh Ntŭk kan ntĭm nti, khoa học ndrel văn hoá Liên hiệp quốc kơp dơn săk ntơ “Công viên địa chất lam ntur neh UNESCO Dak Nông” ân lvang năm 2024-2027. Ơi wa, rnôk ma mhe geh kơp uănh tay bah UNESCO mhe rlau geh đŏng nau mhe rđil bah ma năp nơh?

   Wa Tôn Thị Ngọc Hạnh: Đah 500 nau dơi bah công viên địa chất lam ntur neh ri 6/8 nkuăl bah n’gor đah rnoh 4.700 km2 geh ăp ntil ndơ ơm ueh, neh bri, yôk leng, nau ơm kăl e, âk ntil si gle, neh dak tŏng dơi ma ăp nkô̆ nau dơi geh kơp dơn bah công viên địa chất lam ntur neh. Nau uănh tay tal bar ri lam ntur neh bu uănh ngăn 3 nau: Ngoay lah nau gĭt rbăng bah ƀon lan, bar lah nau kan ntĭm nti, pe lah nau mât ndrel hun hao mpeh văng sa gay ân ƀon lan geh dơi săk rnglay.

      Ndri n’gor Dak Nông moh hŏ ƀư ăp nau nê, ơi Wa?

           Wa Tôn Thị Ngọc Hạnh: Nau kloh ngăn nê lah n’hao nau nkoch trêng, n’hao nau gĭt rbăng tâm ƀon lan ndrel ƀư ân rêng hvi nau kan ntĭm nti mpeh công viên địa chất. Ri hê hŏ leo lăp tâm nau kan ntĭm nti bah nkuăl, nkra jêng săm ƀŭt gay ngih săm ƀŭt ntĭm nti ntơm jrâu 1 tât jrâu 12. Mpeh nau công nghệ ri hên ndâk Trang pâl n’aih mrô, dŏng ăp nau kan bah lam ntur neh dŏng rlau 50 neh dak. Bah điện thoại ri nơm knŭng pơk lih mra leo trong tât ăp ntŭk công viên địa chất bah Dak Nông, mra mbơh ân nơm ntŭk tât, ntŭk nê moh nau geh.

          Kơt ay mhe mbơh, Công viên địa chất lam ntur neh UNESCO Dak Nông geh âk ngăn nau ơm yau, neh dak, si gleh âk ntil...Ăp ndơ ơm ueh aơ hŏ geh n’gor dê dŏng gay ma ƀư hun hao pâl n’aih, njêng geh văng sa ân ƀon lan?

            Wa Tôn Thị Ngọc Hạnh: Nau nkoch ueh ngăn ma hên rđil đah công viên địa chất bah nơm nê lah geh 3 trong pâl n’aih: Nau mprơ ŭnh ndrel dak, nau nkreh m’ak bah trong sial mhe. Nơm dôl ma dŏng du ntil drăp ndơ khlay ngăn nkre geh uănh bah năp măt ân ueh ndrel geh âk âk nti, nkre geh rnoh khlay khoa hpcj gay geh dơi kơl an ăp ntil nau kan pâl n’aih. Ri hên dôl ma kuăl jă ntuh kơl, ăp nŭih ntuh kơl tŏng dơi, tŏng geh gay dơi hun hao nau kan pâl n’aih ta aơ.

        Ơi wa, rơh uănh năl kơp dơn mhe rlau ri ăp nŭih kan bah UNESCO kŏ nkah đă n’gor du đê̆ nau kan mpeh nau mât ăp ntil ndơ ơm geh, nau mât nau ơm yau ăp rnoi mpôl. Dak Nông mra lŏ moh nau ƀư ân geh ngăn nau kan aơ?

            Wa Tôn Thị Ngọc Hạnh: Nau njoch bah n’gor rnôk geh ndơn tay nau dơi săk ntơ lah ân geh rklaih dơi ăp nau nkah đă bah UNESCO. Ndơ ơm geh bah bri gle neh dak nê mô lah kon nŭih ndrel nau pâl n’aih...ăp dĭng lĕ nê ŭch nơm ndrel geh nau dơi gay ma mât, ƀư ân nâp ndrel ƀư tĭng ân hao ueh lơn.

      Lah ueh wa!