Nthoi tay rơh hop tâl  4, nar 31/10, Quốc hội ntêm lĕ du nar tâm nchră mpeh siƀŭt mbơh lôch jêh geh tâm nchră mpeh groi nđôi "Tĭng ƀư trong kơl, pháp luật mpeh trong mpêt nkrem, njrăng bah mpŭng lir lvang năm 2016-2021” tâm ngih dak. Ăp đại biểu quốc hội dăn đă nkra bah ăp nău kŏ kol, jêr jŏt tâm rnôk mât nhih pah kan ngih dak, gay an ăp quy định đăp mpăn geh nău dơi, mpêt nkrem n'hanh săk tam.

Lôch hăn groi nđôi an saơ, nău mât, dŏng prăk ngân sách ngih dak, ăp tơm prăk ngih dak êng ƀa ƀă geh âk nău rgâl uĕh, đăp mpăn mpêt nkrem n'hanh săk tam lơn. Yơn lah, nău mbơh nchŏng kloh đŏng: nău njêng, uănh năl di trong nchrăp sŏk dŏng prăk ngân sách ngih dak mô hŏ grêt dêh ngăn. Hang rbăn trong nchrăp kan ƀư mbrơi, hang rbăn ntŭk ƀư roh huach, mpŭng lir ƀư kân mbrơi tay trong hun hao bah neh dak. Ăp đại biểu dăn đă mô an wăk pêng ăp trong nchrăp kan khlay bah neh dak rhŏ dŏng an hun hao wăng sa rêh jêng kon nuĭh, lơn lah trong kan ƀon lan mpeh yôk yang, nkual rnoi mpôl đê̆. Tâm ăp trong nkra dơi ndơ̆ luh, ăp đại biểu lah rjăp nău ntuh kơl rgum tơm n'hanh wat jêh ngăn mbra bah ir geh nău mĭn tâm pă tâm ban tơm prăk ntuh kơl. Lơn lah, quy định mpêt nkrem, njrăng bah mpŭng lir dŭt ŭch geh nău gĭt êng bah nuĭh cán bộ kruanh rđău kan, lơn lah nuĭh mât bôk ăp nhih pah kan, đơn vị, n'gor tâm dâng.