Đah nău ŭch "rgâl mbrô ntơm bah nuĭh ƀon lan, sŏk nuĭh ƀon lan ƀư rgum tơm", nkuâl Krông Pắk, n'gor Dak Lak hŏ du rơh an ƀư âk trong ndơ̆ rgâl mbrô lăp tâm nău rêh, tĭng kơn njêng dŏng mbrô nsum mpôl bah ăp thôn, buôn. Trong kan dja bôk năp hŏ nsĭt tay nău dơi tam, kơl kônh wa gĭt wât mpeh rgâl mbrô, tĭng kơn dŏng tâm nău rêh ăp nar.  

          Đah du blâm điện thoại pet lât geh ƀoh mạng internet, djăt ma gŭ ta jay dơm, wa Y Kơn Niê (aê Uyên), ta buôn Ea Đun, xã Ea Kênh, nkuâl Krông Pắk hôm dơh trok prăk điện, nạp card điện thoại đŏng. Wa Y Kơn nkoch, ntơm bah rnôk "Nkual ƀon lan dŏng công nghệ mbrô" dơi an ƀư ta ƀon, păng n'hanh âk nuĭh ƀon lan hŏ gĭt wât lơn mhâm lah công nghệ mbrô n'hanh tĭng kơn dŏng công nghệ mbrô tâm ăp nău rêh ăp nar. Wa Y Kơn Niê nkoch:

          "Gâp saơ dŭt âk nău dơh uĕh, ntơm nơh ri prăk điện he ân hăn ndơ̆ tât ntŭk mơ, yơn aƀaơ rgâl mbrô ma dơi gŭ ta jay dŏng ta điện thoại. Kơt nê ri  dŭt dơh ngăn, bah ir roh huach mông hăn, he mbra dah ma ŭch mông ndơ̆, mô kâp hăn tât xã. Cài đặt app ta điện thoại jêng dŭt dơh ngăn.

          Hôm đah nô Y Blen Niê, Bí thư chi đoàn buôn Ea Đun, nơm geh công nghệ mbô, nău an ƀư ăp nău kan, trong leo đoàn mô lah mbơh an đoàn viên druh ndăm tâm ƀon hŏ jêng dơh lơn, ngăch lơn. Ăp đoàn viên druh ndăm lor nchrăp lơn tâm rnôk dơn geh nău lư n'hanh plơng ơh ngăch. Mô dơn nê, nơm geh công nghệ mbô hŏ kơl mpêt mông nar, dŭt dơh rnôk ăp nkô̆ nău jăch ndăn ân ƀư ngăch dĭl. Nô Y Blen Niê nkoch:

          "He njêng ăp rmôt n'hanh nhắn tin ma Zalo, messenger, Facebook n'hanh dŏng ăp rmôt dja gay nhắn tin mbơh an đoàn viên chi đoàn buôn Ea Đun mpeh mông nar hop. Saơ păng dŭt geh nău tam, mô dơn nê he gŭ du ntŭk nha hôm dơi  ƀư rgum hop pơk sŏng dăng dơh lơh đŏng ma Zalo, Facebook.

          Buôn Ea Đun aƀaơ geh rlău 300 rnăk đah bơi 1.500 nuĭh mpeh 7 rnoi nuĭh ndrel gŭ rêh, tâm nê nuĭh rnoi mpôl đê̆ ƀon tơm ta ntŭk âk rlău n'gul. Tĭng wa Nguyễn Khắc Hiệp, Bí thư chi bộ nkre ƀư Kruanh buôn Ea Đun, nơm geh rgâl si tăm ndơ mât geh nău tam, nsĭt geh wăng sa rĭng bôk nuĭh năm rlău aơ hŏ geh tât 55 rkeh prăk/nuĭh/năm. Lơn âk lah nuĭh ƀon lan ntơm bah 16 năm deh let lơ dŏng điện thoại pet lât geh nthoi mạng 4G, dŏng mạng wifi.

Ntơm bah n'gul khay 12 năm 2022, buôn Ea Đun hŏ an ƀư trong ntĭt leo "Nkual ƀon lan gŭ công nghệ mbô", njêng rmôt "công nghệ mbô nsum mpôl tâm ƀon lan" đah 5 nuĭh kan n'gâng tơm tă bah Kruanh buôn ƀư kruanh rmôt. Ntơm bah rnôk ntoh măt, rmôt công nghệ mbô nsum mpôl ƀon lan hŏ nsrôih nkoch trêng mpeh ăp trong dŏng công nghệ mbô tât tĭng nuĭh, tĭng rnăk đah rgum tơm lah ntĭm dŏng ƀư ăp ntil siƀŭt pơk dŏng bah kơi, ăp trong trok prăk mô dŏng prăk măt, phần mềm bảo hiểm y tế, bảo hiểm xã hội, ăp trong ôp nău di nuih n'hâm bah nuĭh ƀon lan đah cán bộ, công chức xã ma trong dŏng Zalo, ntĭm nti dŏng Internet đăp mpăn... Đơn vị tâm njêng đah buôn ntêm pă an du rnoh wifi dŏng dơm an kônh wa gay ntrŭt nsôr nuĭh ƀon lan tât n'hanh dŏng công nghệ mbô, n'hao dŏng âk ăp ndơ pơk dŏng bah ngai.  

Wa Nguyễn Khắc Hiệp an lah, đah trong ƀư bah rmôt công nghệ mbô nsum mpôl lam ƀon lan lah "Hăn goh tĭng mpông, rgŏ tĭng jay" gay nkoch trêng mpeh rgâl mbrô, nuĭh ƀon lan buôn Ea Đun mbra rgâl nău way bên n'hanh n'hao rnoh âk dŏng công nghệ mbô.

          Ma ăp rơh hop ƀon lan tâm ban kơt ăp rơh hop geh tât, tâm nchră ri ƀư lăp jru hăn dăch dêh đah kônh wa, nkoch trêng, rgŏ jă kônh wa râng công nghệ mbô đŏng. Ri aơ lah rnoh tât kan bôk năp lah rnoh tât kan bah Đảng n'hanh bar đŏng lah rhŏ dŏng nău geh an ăp nuĭh ƀon lan tâm nău ƀư siƀŭt tâm ban kơt dŏng công nghệ mbô rhŏ dŏng an nău rêh kônh wa đŏng. Săk gâp nơm ri kơt lah lơn âk dŏng Internet, nkoch trêng ma loa ri du gâl dơm yơn mbơh ta pơk uănh n'hanh mpôl hên njêng trang Zalo rmôt công nghệ mbô nsum mpôl bah ƀon. Dah ŭch kônh wa pơk uănh dơi da dê pơk lăp ma ăp mã QR Code rmôt công nghệ mbô nsum mpôl lam  ƀon lan ri ăp nău lư geh tât kônh wa pơk uănh lor.

          Wa Trần Thị Vân, Groi kruanh UBND xã Ea Kênh, nkuâl Krông Păk an gĭt, tĭng trong leo tâm rlong "Rgâl mbrô lvang năm 2022 – 2025" tă bah UBND nkuâl Krông Pắc rgŏ jă, xã rgum lam trong kan chính trị ndrel ăp mpôl kan, doanh nghiệp n'hanh ăp rơh kơn ƀon lan lăp kan gay ring lam trong leo kan tât lĕ rngôch ăp thôn, buôn, tổ dân phố. Ntơm bah trong ntĭt leo lor bôk năp tă bah UBND nkuâl Krông Pắk rdâk njêng ta thôn Tân Đông (xã Ea Kênh), tât aƀaơ, xã hŏ rlong an ƀư ta buôn Ea Đun, lah buôn dŭt jêr jŏt lơn âk lah nuĭh ƀon lan rnoi mpôl đê̆, nău gĭt blău mô tâm ban. Bôk năp năl saơ nuĭh ƀon lan dŭt nsrôih tĭng ƀư, n'hao dăng rgâl mbrô tâm nău ƀư siƀŭt, trok prăk kaih.

Tâm let năp tay ri gay mât uĕh nău khlay kan bah rmôt công nghệ mbô nsum mpôl lam ƀon lan ri hŏ rdâk njêng trong nchrăp 100 % thôn, buôn ta ntŭk lah mbra ntoh măt nkual ƀon lan gŭ công nghệ mbô dja, gay an nuĭh ƀon lan tât dơi ăp ndơ dŏng geh tât công nghệ mbô kơt trok tâm mô dŏng prăk măt, ndơ̆ prăk bah ngai geh tât điện, sŏk soăy hôm geh tât ăp nkô̆ êng ƀa ƀă đŏng.

Ntơm bah ăp nău dơi bôk năp, trong ntĭt leo "Nkual ƀon lan gŭ công nghệ mbô" hŏ dơi rêng lam tât âk thôn, buôn ta nkuâl Krông Pắk, đah rlău 250 rmôt công nghệ mbô nsum mpôl dơi njêng, nkrum lam ăp thôn, buôn, tổ dân phố. Ăp rmôt dja geh nău tât râng bah âk nuĭh kơt ban tự quản, ban công tác Mặt trận, hội viên ăp chi hội nsum mpôl, nai ntĭm, công an viên, druh ndăm....Lôch nê rgop ndơ̆ rgâl mbrô lăp tâm nău rêh dơh lơn tât ăp nkual jru, nkual ngai, nkual dŭt jêr jŏt mha êng.

H’Xíu H’mốc/Nuĭh rblang: Điểu Thân