Kêng măng 16/7, Groi Thủ tướng Trần Hồng Hà ƀư tơm nar rƀŭn tâm rgop ma trực tuyến đah 22 n’gor, nkuăl ƀon têh gay djăt nau mbơh nau đă ntop nau nchrăp Luật rgâl nkra, ntop tay du đê̆ điều bah ăp Luật tâm nau kan tuch tăm ndrel ntŭk ntu tâm Bôk nau kan ndâk njêng pháp luật năm 2025 bah Quốc hội gưl 15. Nau nchrăp Luật rgâl nkra ntop tay du đê̆ điều bah 16 Luật tâm nau kan tuch tăm ndrel ntŭk ntu, geh pe rmôt tơm: Rgâl nkra, ntop tay gay ma dăp rgum ƀư nau kan, n’gâng kan tâm nkuăl bar gưl ndrel pă nau dơi, gưl kan; ƀư nơih nau kan hành chính, koh n’huch nau dơi nau ntuh kơl tăch rgâl ndrel rklaih nau kan ndal, nkol geh ntoh luh tă bah nau ngăn.

Lôch nar kan, Groi Thủ tướng Trần Hồng Hà đă N’gâng kan tuch tăm ndrel ntŭk ntu lŏ djăt ăp nau rgop đă bah ăp n’gor, ntŭk kan, ndal ƀư jêh nkô̆ nau nchrăp Luật. Êp nê, rmôt ƀư nau kan leo lăp dŏng Luật, Groi Thủ tướng đă nchrăp nchră nau ntrŭnh bah Chính phủ gay doh rklaih ăp nau jêr, nkol ndal tâm nau kan tuch tăm, ntŭk ntu./.