Năm 2022, tât khuch bah nuh srê Covid-19 hŏ ƀư n'gâng kan pâl nđaih Việt Nam srŭng gâng, hang rkeh nuĭh roh nău kan. Ntơm bah n'gul khay 3 năm 2022, rnôk Chính phủ pơk tay mpông nău kan pâl nđaih, ndrel đah lam dak, n'gâng kan n'hanh nuĭh ƀon lan n'hanh nsum mpôl doanh nghiệp tâm trong kan pâl nđaih ta miền Trung hŏ nsrôih rlău jêr jŏt, dâk hao tay dăng  ăp nău kan pâl nđaih. Nău dơi bah Năm pâl nđaih gưl neh dak- Quảng Nam 2022 njêng jâng nsing gay hun hao an n'gâng kan mô n'huk djơh dja.

        Drăp ndơ ntlơi an tay Văn hóa lam ntŭr neh Hội An, n'gor Quảng Nam ăp nar kêng dŭt năm 2022, ta ăp trong nkual ƀon têh ơm yău dŭt âk năch dak bah dih hăn pâl nđaih. Jay ngêt sa, khách sạn n'hanh ăp ndơ rhŏ dŏng khuh n'gôr. Đêt nuĭh mĭn lah, du năm bah năp nơh,  nkual ƀon têh ơm yău Hội An rngot rngăt. Nkual ƀon têh geh tât 2/3 rnoh nuĭh pah kan tâm trong pâl nđaih hŏ rlău 2 năm rgoh n'gơ, nău rêh nuĭh ƀon lan geh rlơ̆ rlơt tă bah nuh srê Covid-19. Aƀaơ, Hội An hŏ sĭt tay rup gui bah du nkual ƀon têh pâl nđaih, kơt mô hŏ tă geh "nuh srê têh" tât rlău ntŭk dja.

        Yuh Nguyễn Thanh Tâm, tơm Biệt thự An, nkual ƀon têh Hội An nchrăp an wơt năch pâl nđaih rnôk Tết Dương lịch n'hanh Tết Nguyên Đán Quý Mão. Tĭng yuh Nguyễn Thanh Tâm, rnôk dŭt jêr jŏt tâm 2 năm aơ hŏ kơl nuĭh ƀư pâl nđaih ta Hội An bên di n'hanh ƀư mhe êng săk he gay hun hao tay pâl nđaih tĭng trong rƀŏng nâp dăng, trong trong ƀư pâl nđaih kloh uĕh. Bol nkôp rnoh tât di pâl nđaih kloh uĕh mhe dơi n'gor Quảng Nam n'gluh an dŏng tâm khay 3 năm 2022 yơn i ngăn, dŭt âk ntŭk rhŏ  dŏng an pâl nđaih ta Hội An hŏ tĭng ƀư ăp rnoh tât kan dja hŏ  ơm bah dŭt jŏ. Na nê̆ kơt lah mô hôm đah ndŏk nhựa, lơi ir dŏng rsôp, hôp nhựa du tơ̆, ƀư pâl nđaih kloh uĕh đah ntŭk gŭ rêh. Yuh Nguyễn Thanh Tâm an gĭt, bôk năp nuĭh rhŏ n'hanh lĕ ma năch pâl nđaih mha êng, âk nuĭh mô tâm ban ŭch yơn nơm geh rôih tĭng ƀư aƀaơ hŏ jêng nău way bên.

       "Trong rƀŏng mhe aƀaơ bah năch dak bah dih n'hanh ăp băl mom Việt Nam geh nău gĭt êng mpeh mât njrăng ntŭk gŭ rêh dŭt âk. Rnôk khân păng saơ he hŏ tĭng dơi trong kan dja ri khân păng dŭt ŭch tĭng.

        Rlău 2 năm aơ, nuh srê Covid-19 hŏ ƀư 42 rbăn nuĭh kan tâm trong pâl nđaih ta nkual ƀon têh Đà Nẵng roh nău kan. Rnoh dja ta 2 n'gor Thừa Thiên Huế, Quảng Nam ntơm bah 14 tât 18 rbăn nuĭh kan. Yơn lah, lôch pơk tay mpông ăp nău kan pâl nđaih, năm 2022, n'gor Quảng Nam hŏ wơt 4,8 rkeh tơ̆ năch pâl nđaih n'hanh lĕ rngôch nsĭt geh bah pâl nđaih geh nklăp 3.800 rmen prăk, nta joi nău kan an rlău 16.000 nuĭh kan. Wa Phan Hộ, Giám đốc Ban Mât njrăng drăp ndơ ơm yău ntlơi an tay Văn hóa Mỹ Sơn an gĭt, bol jêr jŏt yơn đơn vị hŏ nsrôih kân jâng 125 nuĭh pah kan. Rnôk pơk tay mpông, Mỹ Sơn hŏ wơt rlău 105 rbăn tơ̆ năch pâl nđaih, hao rlău 110% rđĭl đah trong nchrăp năm 2022.

       "Tâm du bông nău tât khuch bah nuh srê, mpôl hên mô geh du rnoh nsĭt geh wăng sa. Đah du ntŭk kan mât dŏng êng mpeh tơm prăk dŭt jêr jŏt. Mpôl hên rgŏ jă mpôl cán bộ, nuĭh kan, nkre dŏng tơm prăk rnă ntêm lor gay ndơ̆ prăk khay an khân păng. Rmôt cán bộ, nuĭh kan nsing nơm tâm nhih pah kan he nơm n'hanh khân păng ndrel nsrôih gay rlău dơi jêr jŏt".

        Việt Nam gŭ tâm săk ăp dak pơk  tay mpông dŭt ơm n'hanh dơi Nhih pah kan pâl nđaih lam ntŭr neh rnê lah geh trong kan pơk mpông dŭt soih aih. Năm 2022, ăp n'gor, nkual ƀon têh miền Trung lor nchrăp ƀư ăp nar têh gưl dak bah dih, an ƀư âk nău kan ntrŭt ntrôl ngăch, nkoch trêng tât Châu Âu, Hàn Quốc, Singapore, Ấn Độ, Nhật Bản, tĭng kơn pơk tay trong mpăr hăn dak bah dih. Ta nkual ƀon têh Đà Nẵng, geh mbro ăp trong mpăr hăn dak bah dih jŭr tât Đà Nẵng dơi nthoi tay lôch jong nar tăch pruăt hŏ nthoi tay đah năch hăn pâl nđaih dak bah dih. Tĭng rnoh nchih rgum bah Tổng cục Du lịch Việt Nam, năm 2022, rnoh âk pâl nđaih dak bah dih tât Việt Nam nchroh 3,5 rkeh tơ̆. Ngoăy tâm ăp trong nkra khlay gay wăch rgum năch dak bah dih tât pâl nđaih ân ƀư mhe tay ăp ntŭk tât, ntrôl dăng tâm rgop pâl nđaih đah ăp n'gor, nkual ƀon têh lam dak. Wa Lê Trí Thanh, Kruanh UBND n'gor Quảng Nam an gĭt, tâm rgop hun hao pâl nđaih lah trong rƀŏng khlay, mô dơn kơl ăp n'gor ntik dơi săk geh êng ma hôm mât dŏng ăp rnoh khlay nsum mpeh ndơ mpêt khlay, drăp ndơ ơm yău ntlơi an tay văn hóa tâm nkual, rgop ntrŭt ntrôl n'gâng kan pâl nđaih hun hao nâp dăng.

        "Mpôl hên hŏ rdâk njêng ăp ndơ geh ƀư nsing tâm bri dak neh ntu, mât dŏng ăp rnoh khlay ma neh ntu ntăm an Quảng Nam tâm ban kơt rnoh khlay mpeh văn hóa, nkual neh, kon nuĭh ma Quảng Nam geh săk geh âk. Nkre mbra tâm rgop kan nsum đah ăp n'gor êng ƀa ƀă tâm Nkual wăng sa rgum tơm miền Trung krêp dêh n'hanh rdâk njêng ăp rnoh ndơ geh ƀư tâm di gay nkoch n'hơ ndơ geh ƀư pâl nđaih kloh uĕh tât băl mpôl dak bah dih".

        Ta rơh Lễ nkhôm rnê pâl nđaih lam ntŭr neh năm 2022 - nkual châu Á n'hanh châu Đại Dương, pâl nđaih Việt Nam hŏ dơn geh 16 ndơ nkhôm rnê pâl nđaih, năl di tay săk ntơ lư, nău khlay kan n'hanh ntŭk gŭ kan pâl nđaih Việt Nam tâm nkual n'hanh lam ntŭr neh. Wa Đoàn Văn Việt, Thứ trưởng Bộ Văn hóa, Thể thao n'hanh pâl nđaih lah rjăp, nău ƀư geh nău dơi Năm pâl nđaih neh dak - Quảng Nam 2022 hŏ nsĭt tay nău dơi tam âk tâm nău wăch rgum ntuh kơl, hun hao ndơ geh ƀư pâl nđaih n'hanh nău kan ntrŭt nsôr nkoch n'hơ rup gui, neh dak, kon nuĭh Việt Nam, njêng păng rup bêng ăp săk ntơr n'hanh uĕh lăp măt uănh bah n'gâng pah pâl nđaih Việt Nam rnôk mpôch tay nău kan pâl nđaih năm 2022 rƀŏng tât năm 2023 âk rhơn nđơr, mpŏng nthoi tay ăp nău dơi tay tâm nău kan./.

Long Phi/ VOV miền Trung/Nuĭh rblang: Điểu Thân