Kêng măng 27/1 (jêng lah mồng 6 khay ngoăy), Thủ tướng Chính phủ Phạm Minh Chính ƀư tơm rơh hop Rnâng kan Chính phủ gay uănh năl nô nău Tết n'hanh an ƀư nău kan lôch bah kơi Tết.

Ta rơh hop, ăp đại biểu uănh nă , Tết Quý Mão năm 2023 hŏ dơi ƀư răm mƀak, uĕh lăng, đăp mpăn, mpêt nkrem. Tĭng nê, tâm rnôk Tết Nguyên đán pah kan njrăng, n'gang nuh srê, but săm ji; đăp mpăn kloh uĕh ndơ ngêt sa dơi ƀư răp jăp. Ntơm bah nar 20 - 26/01/2023, mô năl geh khêh ndơ sa. Ăp nuĭh dơi kơl, đoàn viên, nuĭh kan ach o, ăp rnăk ƀon lan mâp âk jêr jŏt dơi mât chăm Tết da dê, đah lĕ rngôch prăk kơl tết bah 63 n'gor nklăp 9.500 rmen prăk kơl rlău 25 rkeh tơ̆ nuĭh. Pah kan nchrăp ndơ dŏng Tết hŏ dơi ăp n'gor n'hanh ăp doanh nghiệp ƀư njêng, tăch rgâl nsrôih an ƀư bah ơm. Tơm ndơ tăch âk mpưm, rnoh khlay mô geh rgâl hao âk; mô an geh pah pât ndơ tăch hao rnoh khlay, lơn lah đah pring xăng. Nô nău pă an điện an lam trong rse ngih dak tâm rnôk Tết đăp mpăn. Ăp nău kan văn hóa, thể thao, pâl nđaih n'hanh nkoch trêng nău lư dơi ƀư đah âk mpưm trong nkoch trêng, săk uĕh njroh mprơ âk, njêng lơp uĕh văn hóa âk ntĭl săk ntơr.

N'glôch jêh rơh hop, Thủ tướng Chính phủ Phạm Minh Chính dăn đă ăp bộ, ăp nhih pah kan, ăp n'gor ân ndăn lăp pah kan dĭl, mô an geh mbrơi nkai khuch tât nău kan ƀư njêng, tăch rgâl, ăp nău kan wăng sa- rêh jêng kon nuĭh; mô ƀư ăp nău kan pâl năm mhe jŏ jong, sa Tết ƀư khuch tât nău kan, mông pah kan; nsrôih ƀư lôch jêh nău kan ntơm bah bôk năm gay rgop tĭng ƀư geh nău dơi tât rnoh kan, nău dơn kan, trong nchrăp hun hao wăng sa - rêh jêng kon nuĭh năm 2023.

VOV/Nuĭh rblang: Điểu Thân