Kêng măng ntri 2/12, ta n’gor Bà Rịa- Vũng Tàu, Thủ tướng Phạm Minh Chính, Kruanh Hội đồng tâm pă nău kan nkual Đông Nam Bộ ƀư tơm Tâm nchră tâl 5 bah Hội đồng, đah nkô̆: Hun hao wăng sa "2 mbrô" nkual Đông Nam Bộ năm 2025: "Ntul rlong, dơh uĕh n’hanh trong nkra". Lah n’glôch jêh tâm nchră, Thủ tướng Phạm Minh Chính rgum nkoch tay nău dơi hŏ geh tâm  hun hao wăng sa- rêh jêng kon nuĭh bah nkual, Thủ tướng rnê nkual ƀon têh Hồ Chí Minh, Bình Dương, Bà Rịa -Vũng Tàu, Đồng Nai… hŏ geh âk nău dơi khlay rgop tâm nău hun hao nsum bah neh dak.

 Thủ tướng dăn đă let năp tay GDP bah lam nkual ân geh rlău 7%, hao rlău lam dak. Năm 2025, Thủ tướng đă  nkual an ƀư lor hun hao,  nsrôih hun hao 2 mbrô, yor tĭng Thủ tướng geh hun hao ri rnoh têh wăng sa mơ dơi ntik hvi, mơ rgâl geh hao dơi jăch ngăch nău kan, mơ geh suan ntrôl gay ntuh kơl an hun hao, mơ đăp mpăn dơi rnă njrăng, njrăng n’gang neh dak, đăp mpăn chính trị, n’hao nău rêh drăp ndơ an nuĭh ƀon lan.