Tĭng N’gâng kan Công thương n’gor Gia Lai, nchroh mbơh nău ŭch năp rwăt tâm rơh Tết Nguyên đán Quý Mão 2023 mbra hao nklăp 30%. Gay đăp mpăn pă ndoh ndơ, N’gâng kan lĕ đă ăp ntŭk kan, doanh nghiệp mbơh ƀư trong nchrăp ntêm nkrem ăp ndơ dŏng khlay, lơn lah ndơ sông sa, ƀư tĭng săk rnglăy bôk nău kan đăp mpăn rnoh khlay, tăch ndơ di rnoh aơ. Nkre, ăp ntŭk kan ký ton đăp mpăn uĕh nâp ndoh ndơ, geh sam ƀŭt nchih tŏng ăp, tu tơm nkra njêng kloh na nê̆. Wa Đào Thị Thu Nguyệt, Groi Giám đốc N’gâng kan Công thương Gia Lai, mbơh:

 “Rnoh ndoh ndơ năm aơ nchrăp mbra geh 20.800 rmen prăk, rnoh rmeh ntêm ăp năm aơ lah đăp mpăn. N’gâng kan Công thương mbơh ƀư ăp trong nchrăp an ăp doanh nghiệp gay ntêm nkrem ndoh ndơ tŏng tăch n’hanh kơl nuĭh Việt Nam dŏng ndơ Việt Nam gay mbơh ƀư ăp bôk nău kan tâm rơh Tết. Ntêm nkrem ndoh ndơ tŏng ăp nău ŭch dŏng, mô an hao khlay ndal tâm rơh Tết Nguyên đán 2023 aơ”.

Ntŭk kan mât uănh ntŭk tăch uănh nđôi ta Siêu thị Coop Mart Buôn Ma Thuột.

Ta n’gor Dak Lak, ntŭk tăch ndoh ndơ rhŏ tết Nguyên đán Quý Mão dôl n’gŭr răm. Đah 2 ntŭk tăch giò chả ta nkual ƀon têh Buôn Ma Thuột, yuh Nguyễn Thị Nguyệt, an gĭt, rơh Tết rnoh ndơ pă an ntŭk tăch hao bơi 3 tơ̆, âk ngăn dơi tăch nklăp 7 tạ/nar.

“Ntŭk aơ tăch nklăp 5 năm hôm, ri ăp năm gâp ƀư Tết rnoh ndơ âk, ndơ ƀư ta aơ knŭng dŏng poăch mhe dơm, mô dŏng nđik, sŏk ta ntŭk nkhĭt roch geh ndâk âk poăch kah ri sŏk lĕ. Aƀaơ nău răk lah dŭt khlay ngăn, hôm ăp ndơ cheh ri an ƀư tĭng N’gâng kan dak si, khân pơng an ndâk âk ri ƀư dâng nĕ dơm”.

          Ntŭk nkret gâm ndơ sông sa Thành Phát, nkual ƀon têh Buôn Ma Thuột tât rnôk aơ lĕ ntêm nkrem tŏng ăp lĕ ăp ntil ndơ ŭch dŏng. Tĭng wa Vũ Thị Gấm, mât uănh ntŭk nkra njêng, nchroh mbơh, rơh Tết năm aơ nău ŭch ndơ hao nklăp 20% nkôp đah ăp nar. Gay đăp mpăn tŏng ăp ndơ, ntŭk nkret gâm lĕ nchrăp nchăm ndơ ta ăp ntŭk kan bah nkual ƀon têh Hồ Chí Minh n’hanh du đêt hợp tác xã nkra njêng lŏ mir kloh uĕh tâm n’gor Dak Lak:

          “Ndoh ndơ kơt ƀănh mứt, kẹo ăp ntil ri lĕ nglăp geh 90% hôm. Tal 2 aƀaơ dôl hăn tâm lvang ƀư dưa món jăm ngăn, ăp ntil ndơ way dŏng Tết. Ăp năm kơt nĕ, tĭng tâm ton đah mât uănh ntŭk tăch, doanh nghiệp nglăp rwăt ndơ tĭng di tu tơm nkra njêng na nê̆, jêh nĕ tem lĭr ăp ndơ nglăp rwăt an kloh na nê̆ tay gay đăp mpăn nău dơi nuĭh dŏng”.

Gay đăp mpăn rnoh ndơ n’hanh rnoh khlay ndoh ndơ, rlău 1 khay aơ rmôt mât uănh ntŭk tăch mpeh tâm Ntŭk kan mât uănh ntŭk tăch n’gor Dak lak lĕ n’hao ăp nău ƀư uănh nđôi. Nkre ntrôl dăng nkoch trêng mbơh rblang pháp luật n’hanh ký ton đah ăp rmôt kan êng nuĭh mô rdêng mât prăp, tăch ndơ rlăm, ndơ mô gĭt tu tơm. Wa Mai Mạnh Toàn, Ntŭk kan mât uănh ntŭk tăch n’gor Dak Lak an gĭt:

“Mĭn uănh ntŭk nuĭh, ntil ndơ khlay, ndâk njêng trong nchrăp ƀư na nê̆ gay mbơh ƀư geh săk rnglăy, n’hao uănh nđôi ntŭk tăch n’hanh rmal rjăp ăp nău ƀư tih đah ndoh ndơ khlay rhŏ nău ŭch nuĭh ƀon lan tâm rơh Tết”.

Mpôl uănh nđôi ăp nău kan mpeh đăp mpăn ndơ sông sa ta ntŭk ƀư giò chả.

N’gor Dak Lak ndâk ƀư đŏng 3 rmôt uănh nđôi ăp nău kan mpeh đăp mpăn ndơ sông sa, ƀư uănh nđôi ta ăp ntŭk nkra njêng, nkret gâm, tăch, nglăp rwăt ndơ, tăch ndơ ngêt sa, tăch ndơ sa trong nkual ƀon têh ta 7 nkuăl, nkual têh n’hanh nkual ƀon têh Buôn Ma Thuột. Wa Phạm Thế Hoan, Groi chánh thanh tra N’gâng kan tuch tăm mât rong n’hanh Hun hao ƀon lan an gĭt:

“Tă bah uănh nđôi ri saơ lĕ rngôch ăp rnăk, rmôt kan êng nuĭh nkra njêng tăch rgâl mpeh đăp mpăn ndơ sông sa tĭng uĕh ăp nău ntrŭnh bah pháp luật. Yơn lah geh du đêt ntŭk geh nău tih ri mpôl hên rmal tĭng nău ntrŭnh. Tâm rgop đah uănh nđôi ri mpôl hên mbra nkoch trêng nău ntrŭnh mpeh pháp luật mpeh đăp mpăn ndơ sông sa n’hanh ntĭm an ăp ntŭk nkra njêng tăch rgâl đăp mpăn ndơ sông sa tĭng nău ntrŭnh”.

Gay đăp mpăn rnoh khlay ntŭk tăch di rơh Tết Nguyên đán Quý Mão 2023, UBND n’gor Dak Lak lĕ an rlău 1.500 rmen prăk gay ntêm nkrem ndoh ndơ dŏng khlay. Rmôt ndơ an rgum đăp mpăn di dŭt năm 2022 n’hanh Tết Nguyên đán Quý Mão 2023, geh: ndơ sông sa (phe ngăn, phe kah tuch tăm tâm dak), poăch mpa (poăch sŭr, poăch kik djăr, dak ngi, sĭk, ƀŏt ngŏt n’hanh ăp ntil ndơ nkret gâm, biăp, bum, play), dak pring xăng. Nar đăp mpăn rnoh khlay bah nar 30/11/2022 tât nar 30/2/2023.