* Ea Súp lah nkuăl n’har bri ta Dak Lak, ƀah đah nkuăl ƀon têh Buôn Ma Thuột klâp ma 85 km. Tâm 5 năm ba năp, nkuăl Ea Sup geh ntuh kơl rdâk njêng 80 nău kan ndơ dŏng ntung trong ta 9 xã đah lĕ rnoh prăk ntuh kơl rlău 91 rmen prăk. Rlău ma nĕ, nkuăl lĕ geh rgum kơl ƀư mhe n’hanh nkra mhe 673 ngih jay đah lĕ rnoh prăk rlău 20 rmen prăk. Ta nkuăl geh bơi tât 20 rbăn rnăk ach o, rnăk dăch ach o geh manh prăk an lor gay ma ntuh kơl pah kan jan sa, tăch rgâl geh săk rnglăy. Wa Y Mlai byă, ta ƀon Ea Sup, nkuăl têh Ea Sup an gĭt, ndrel đah ntuh kơl hun hao wăng sa, ƀon lan dŭt mât uănh tât nău mât rbăy nău ueh êng mpôl rnoi nơm.

“Lah ueh Đảng n’hanh ngih dak, lah ueh ăp kruanh ƀon way hăn ndrel leo mom ndăm mât rbăy nău ueh êng mpôl rnoi, hun hao wăng sa, tâm nđur pah kan kơt nti, nău rêh hun hao n’hanh nău mĭn tâm rnglăp ueh. Tâm năm mhe gâp ŭch ƀon lan nơm ueh răm, đăp mpăn hơm răm, kon său nti blău, ăp nuĭh bu ranh ntĭm nti nău way nơm an kon său ăp nău ueh êng bâh rnoi Rđe nơm”.

* Wa Y Mlúi (rnoi Jrai), nuĭh nsing nơm ta ƀon Weh, xă Hà Bầu, nkuăl Đak Đoa, n’gor Gia Lai gĭt saơ: Năm 2022, kônh wa rhơn yor ăp nău ƀư wăng sa-rêh jêng, nkra njêng lĕ dơi plơ̆ tay nâm ơm. Kônh wa đăp mpăn ƀư sa, tăch tơr. Âk rnăk lĕ ndâk ƀư geh jay mhe, têh uĕh.

“Tât aƀaơ kônh wa dŭt răm rhơn yor pah kan jan sa đăp mpăn. Aƀaơ kônh wa rhơn, rgum nkra njêng, hun hao wăng sa n’hanh đăp mpăn ƀư sa. Tăm n’hanh mât chăm cà phê, ndâk ƀư jay gŭ têh uĕh, geh ntŭk rlu rlău, sông sa. Ăp nău ntrŭnh nău kơl bah Đảng, Ngih dak n’gluh an nuĭh ƀon lan ƀư tĭng di; nuĭh ƀon lan lĕ dŭt rhơn geh nău rêh kơt nar aơ. Săk nơm, rnăk wâl mpôl hên lĕ đăp mpăn ƀư sa, yor năm cà phê săk geh rnoh khlay tay, săk geh pah kan tâm năm bah năp hao da dê jêng kônh wa dơi geh âk nău răm.

* Bon U2 ta nklang nkuăl têh Ea Tling, nkuăl Cư Jut, n’gor Dak Nông. Ƀon aƀaơ geh rlău 320 rnăk đah klâp ma 1.600 nuĭh, tâm nĕ rnoi Bunong geh 25%.

Nău rêh bâh ƀon lan knơm ăp ntil tơm tăm geh rnoh khlăy kơt cà phê, tiêu, điều, ăp ntil bum tuh mbo n’hanh mât rong sŭr, ndrôk, kik djăr. wa Y Ghông-bu ranh ƀon U2 lah bu ranh tă kan cách mạng an gĭt.

“Kăl e nơh ê hŏ rklaih đăp mpăn, nău rêh Bu nong jêr jŏt ngăn, mô tŏng sa tŏng nsoh. Hôm aƀaơ geh Đảng, ngih dak mât kơl, ta ƀon U aơ nău rêh ƀon lan lĕ mbơm oi ngăn, mô hôm nă geh rnăk ach o. Kanŭng nuĭh ƀlao kan dơm mô geh, nău kan ni, bâh tăm tiu, cà phê, tuh mbo mbo, lĕ ndơ aơ tât ndơ ri mô geh ji ngot, tŏng sa đŏng. Kơt rnăk vâl ƀư lŏ pă an oh kon đŏng, geh du năm 70-80 bao đŏng, tŏng sa, mô geh ji ngot”.