Rnăk vâl wa H’Er, ƀon Ting Wel Đơm, xã Dak Nia, geh tăng âk bâr gơm tâm nar tâm mâp rgum rnăk vâl. Kuăn tong ndrănh gai ân năch ngêt, wa mbơh, ndrănh yăng rnôk aơ mô knŭng geh ngêt tâm rnôk tâm mâp ma rnăk vâl, ma ƀon lan, ma kônh wa hôm njêng geh tăch ân ma năch đŏng.

            “Gâp ntĭm kon gâp n’gon ndrănh, jêh ri lŏ ntĭm ân măm gâp đŏng. Jêh aơ săk gâp ranh ri ân kon, măm gâp kơt n’gon ndrănh yăng kơt aơ đŏng”.

            Ƀon tâm êp ma nkuăl ƀon têh Gia Nghiã, Xã Dak Nia geh n’gor Dak Nông ndâk ƀư ntŭk pâl n’aih nsum mpôl bah kônh wa rnoi Bunong Mạ. Ndrel ma nau bonh đă ƀon lan mât ân ueh, kơt tĭng nau vay ơm kơt lah tur chĭng, ndâk tay ăp nau vay ơm, ndâk ăp ƀon ƀư nau kan, xã hŏ ndâk du rmôt gay ma ntĭm nti nau tanh njuh ndrel du rmôt gay ma n’gon ndrănh yăng, njêng ăp ntil ndơ ơm ueh leo nsĭt nau săk geh văng sa ân ƀon lan.

            Đah ăp nau rgâl ngăch, năm 2018, Dak Nia lah xã bôk năp bah nkuăl ƀon têh Gia Nghĩa ƀư jêh bôk nau kan ndâk njêng ƀon lan mhe. Xã hôm ndâk nau kan tơm bah n’gor mpeh nau nsum ty mât ntŭk ntu gŭ âm tâm ƀon Phai Kon Pru Đăng, ƀư rêng nau mât răk ân kloh ƀon lan, rƀŏng tât nau ndâk njêng ƀon lan mhe n’hao prêh. Nô Y Brôn, Kruanh ban mặt trận ƀon Phai Kol Pru Đăng, nkoch:

            “Nau ntrơn rgâl bôk năp lah geh trong ueh, geh ndeh klư hăn ro nơih, geh điện, geh dak kloh, hăn nti ri geh ngih săm ƀŭt nâp ueh, lah ji kuet geh ngih dak si. Mpeh nau văng sa ri kŏ rgâl âk ngăn, ƀư cà phê cao su ri mât chăm ân ueh nau kan tĭng kơt nau mhe, tĭng khoa học. Ndrel nau kan vay ơm geh tay prăk rgâl nau rêh đŏng”.

            Wa K’Srai, Kruanh Uỷ ban MTTQ Việt Nam xã Dak Nia, mbơh, lam xã geh 12 thôn, ƀon, đah 14 rnoi oh nô ndrel rêh. Rnoh nŭih rnoi mpôl đê̆ geh tât 40% rnoh nŭih. Kônh wa ăp nroi mpôl mro tâm rnglăp ndrel mât nau hun hao văng sa, rêh jêng, ân nau rêh lơn hơm răm. Đảng uỷ n’gâng kan bah nkuăl ndrel ƀon lan dôl nsôih hun hao văng sa gay ma n’hao nau geh ân du hê bôk nŭih geh rlau 60 rkeh, ndrel tât năm 2025 xã mra mô hôm rnăk êp ach o. Wa K’Srai ngơi:

            “Kônh wa ri mro geh tâm kơl tâm nau rêh, tâm nau pah kan jan sa, mro tâm rnglăp ndrel nsum hun hao văng sa rêh jêng. Phung hên rhơn ngăn yor nau rêh geh âk nau rgâl mhe”.

            Nau nsôih hun hao bah ăp kônh wa ăp rnoi ta Dak Nia hŏ rgop nau ndrel ma ăp nkuăl êng ndâk nkuăl ƀon têh Gia Nghĩa ƀư jêh bôk nau kan ƀon lan mhe tâm năm 2022. Tết tât, năm mhe sĭt, tâm nau hun hao mhe, nŭih ƀon lan Dak Nia lơn ma rhơn nsum n’hâm ân nau rêh ueh lăng lơn./.