Mbah rhơn nkah ndray 93 năm nar njêng Đảng n'hanh rƀŏng tât nkah ndray 15 năm nar njêng thị xã Buôn Hồ, ôi (1/2), UBND thị xã Buôn Hồ, n'gor Dak Lak ƀư ntơm rdâk njêng ăp ntŭk kan têh khlay bah thị xã, nsrôih tât di rnoh nkual ƀon têh ntil III.

UBND thị xã Buôn Hồ, n'gor Dak Lak ntơm rdâk njêng 4 ntŭk kan têh khlay, rgum tâm nău kan ƀư ntung trong đah rnoh ntuh kơl nklăp 37 rmen prăk, nchrăp ƀư lôch jêh tâm quý 2 n'hanh quý 3 năm aơ. Ăp nău kan khlay dja gay rgop geh ntung trong, tŏng an rsong hăn bah nuĭh ƀon lan. Wa Đặng Gia Duẩn, Kruanh UBND thị xã Buôn Hồ an gĭt, đah nău ƀư ntơm bah bôk năm mhe, thị xã nsrôih dŏng geh nău tam ăp tơm ndơ ntuh kơl bah ngih dak. Nkre, mbra ntrôl dăng wăch rgum âk mpưm tơm ndơ ntuh kơl, nsrôih rdâk njêng thị xã Buôn Hồ jêng ntŭk rgum wăng sa, văn hoá, rêh jêng kon nuĭh nkual mpeh bah lơ n'gor Dak Lak, rgop khlay tâm nău hun hao bah nkual.

VOV Tây Nguyên/Nuĭh rblang: Điểu Thân