Măng 2/11, ta ntŭk Rgum tâm nchră gưl neh dak, Thủ tướng Chính phủ Phạm Minh Chính râng n'hanh lah ta rơh Mbơh ndơ geh ƀư di rnoh săk ntơ lư gưl neh dak Việt Nam tâl 8, năm 2022.

Aơ lah du nar kan khlay, gay mpư rnê rhơn n'hao ăp săk ntơ lư ndơ geh ƀư tăch, rhŏ dŏng săk uĕh, geh nsing nơm, mpơl  nău hun hao dăng bah nsum mpôl doanh nghiệp Việt Nam n'hanh jâng wăng sa, rgŏ jă ndơ̆ săk ntơ lư Việt nar lơn ma jêng dêh bên, nsing nơm n'hanh uĕh lơn ta ntŭk tăch rgâl tâm dak n'hanh dak bah dih. Lôch bơi 20 năm an tĭng ƀư, rnoh âk doanh nghiệp geh ndơ di rnoh săk ntơ  lư  gưl neh dak hao âk mbro rlău ăp năm, ntơm bah 30 doanh nghiệp năm 2008 hao 172 doanh nghiệp năm 2022.  172 doanh nghiệp geh săk ntơ lư gưl neh dak năm 2022 nsĭt geh tăch rgâl nkah uĕh đah lĕ rngôch nsĭt geh năm 2021 nklăp 1.570 rbăn rmen prăk, nôp ngân sách ngih dak bơi 129 rbăn rmen prăk, nta joi nău kan, nsĭt geh an bơi 600 rbăn nuĭh kan, tĭng ƀư ăp trong kơl đăp mpăn rêh jêng kon nuĭh n'hanh dơn kan nsum đah lam rêh jêng kon nuĭh bah doanh nghiệp. Ntơh măt kruanh rđău kan Đảng, Ngih dak, Thủ tướng Phạm Minh Chính mbah rhơn 172 doanh nghiệp geh ndơ tât rnoh săk ntơ lư gưl neh dak năm 2022; nkre lah rjăp, nău dơn kan rdâk njêng n'hanh n'hao săk ntơ lư gưl neh dak jŏ jong n'hanh aơ lah nău kan dŭt jâk yơn dŭt n'hâm chrat ang bah rmôt doanh nghiệp, doanh nhân Việt Nam.

VOV/Nuĭh rblang: Điểu Thân