Kêng măng 17/12, Thủ tướng Phạm Minh Chính ƀư tơm Rơh rƀŭn Ban Ntĭm rđău bah Chính phủ mpeh n’glôch jêh ƀư tĭng Nghị quyết 18. Tĭng nău mbơh, tât aƀaơ, N’gâng kan Nội vụ lĕ lôch jêh nău mbơh n’glôch jêh Nghị quyết 18-NQ/TW; Bôk nău rgop an tâm nchrăp rgum lăp nsum, tâm di ngăn, tâm pleh gưl kan, nău kan, rmôt kan ƀĭt joet n’hanh ăp sam ƀŭt geh tât, ndrel nău rgop an tâm nchră lôch nău kan Ban Cán sự đảng, ndâk njêng Đảng bộ Chính phủ, Đảng bộ bộ, ngih pah kan tâm ban bộ, ngih pah kan mpeh tâm Chính phủ.

Ăp rmôt kan jêh dăp tay, tâm di n’hŭch bah 35 tât 40% bôk nău kan; ăp rmôt kan ƀa ƀă dăp tâm trôm ri n’hŭch đêt ngăn 15%. Bôk năp jăng lơi ăp tổng cục n’hanh ăp rmôt kan tâm ban; bôk năp nchrăp n’hŭch 500 cục mpeh tâm bộ, ăp tổng cục. Ntoh ngơi ta rơh rƀŭn, Thủ tướng Phạm Minh Chính lah rjăp, nău dăp tay, tâm pă tâm di n’hanh rmôt kan ƀĭt joet an m’hâm ƀư jêt dơh, pah kan tam, săk rnglăy ndrel đah dăp tay n’hanh n’hao uĕh rmôt cán bộ, công chức, viên chức. Tâm rnôk dơh jêt ƀĭt joet an ndâk njêng, nkra trong kơl di ngăn, geh trong an ndơn tay ăp nău kơl bah sa ơm tât aƀaơ. Lơn lah, đah nuĭh pah kan tâm ton, Thủ tướng đă an geh nău kơl tâm di, mô an nuĭh pah kan tâm ton mô tŏng ăp.