Thủ tướng Phạm Minh Chính mhe geh nar tâm mâp cử tri jêh rơh rƀŭn tal 8, Quốc hội gưl XV đah rlau 200 cử tri ntoh măt ân ăp xã, nkuăl têh, ăp nŭih rđau, kruanh ăp mpôl chroh rƀŭn tâm nkuăl Cờ Đỏ, nkuăl ƀon têh Cần Thơ. Thủ tướng hĭ mbơh tât ăp cử tri nau geh bah rơh rƀŭn tal 8 ndrel nau văng sa rêh jêng bah neh dak mhe rlau, nau rgâl mhe, dăp rgum ntrong kan chính trị, n’huch biên chế geh nsum đah nau ndâk tay, n’hao nâp kan, dŏng săk tam rmôt cán bộ, công chức, viên chức; n’huch dŏng ƀa ƀơ ndrel rgop tâm nau rgâl prăk khay.

Nkre, Thủ tướng kŏ mbơh nau đă bah cử tri tât ăp nau, kơt: Geh tât trong hăn, ngăn lah trong hăn ngăch Bắc-Nam, Trong loih hăn ngăch Bắc-Nam, ăp nau kơl an ma nŭih geh n’hâm ma cách mạng; nau kan rdâng dak lip băm, mât đăp mpăn dak tâm nkuăl Đồng bằng sông Cửu Long. Thủ tướng lah rjăp rnôk aơ, Chính phủ ndrel ăp n’gor dôl ƀư ăp nau rgum tay du rkeh ha neh gay tăm du ha ba, ndâk săk ntơ ba phe Việt Nam ntoh lư lam ntur neh, âk ntŭk tăch, kơl an khoa học, nau kan ntrơn rgâl mrô./.