M’nông – Dơn nău jă bah Thủ tướng Campuchia Samdech Techo, Kruanh ASEAN 2022, Thủ tướng Phạm Minh Chính mbra khâl na nê̆ Campuchia bah 8-9/11 n’hanh râng rƀŭn nchră gưl prêh ASEAN n’hanh ăp rƀŭn nchră geh tât bah 10-13/11. Aơ lah rơh hăn khâl na nê̆ Campuchia bôk năp bah Thủ tướng Phạm Minh Chính ta nău ƀư Thủ tướng Chính phủ n’hanh rơh khâl bôk năp bah kruanh n’gâng tơm Việt Nam tât Campuchia tâm năm Dăch dêh Việt Nam-Campuchia 2022.

Rơh hăn khâl gêh tâm rnôk tâm boh oh nô uĕh lăng, dăch dêh way ơm, kan ndrel lĕ rngôch, nâp nâl, jŏ jong đah Việt Nam n’hanh Campuchia hun hao đăp mpăn. 2 ding tâm rgop ƀư âk nău kan geh nkô̆, nkah gĭt 55 năm ndâk njêng tâm boh tâm rnglăp. Tâm rnôk rơh khâl nchrăp, Thủ tướng Phạm Minh Chính mbra rgum nchră đah Thủ tướng Campuchia Hun Sen n’hanh Thủ tướng Hun Sen râng ntoh ngơi ntĭm rđău ta rƀŭn ntrŭt ngăch ntuh kơl Tăch rgâl Việt Nam-Campuchia, Rgum nchră đah kđăch Norodim Sihamoni, Kruanh Thượng viện Say Chhum, Kruanh Quốc hội Heng Samrrin n’hanh mâp du đêt kruanh gưl prêh bah Campuchia.