Kêng măng 26/1 (lơ 5 tết), Thủ tướng Phạm Minh Chính mêt uănh, bonh đă ƀư bôk nau kan Nha Trang-Cam Lâm, tâm bôk nau kan nkra trong hăn Bắc-Nam mpeh ba dâng rơh ngoai, khâl rhơn Tết cán bộ, nŭih pah kan bah bôk nau kan. Trong hăn ngăch Bắc-Nam mpeh ba dâng rơh 1 (2017-2020) jong nklăp 652,86 km, geh pă jêng 11 bôk nau kan (3 bôk nau kan rgum tâm boh nsum êng PPP ndrel 8 bôk nau kan ntuh kơl nsum). Tâm nê, nau kan nkra trong hăn ngăch geh Nha Trang-Cam Lâm jong 49km, hăn rlet nkuăl Diên Khánh, Cam Lâm ndrel nkuăl ƀon têh Cam Ranh (n’gor Khánh Hoà).

Bôk nau kan geh rnoh ntuh kơl rlau 7.600 rmen, tâm nê tơm prăk Ngih dak râng nklăp 2.967 rmen. Hăn njok trong aơ, Thủ tướng rhơn bah năp nau nkra trong ntơm jêh, âk trong jêh dơi hăn. Tâm trong dôl nkra, Thủ tướng rnê ăp ntŭk kan, rmôt kan, rmôt cán bộ, nŭih pah kan hŏ pah kan đah nuih n’hâm “rlet rlau ma tết”. Thủ tướng đă ăp rmôt kan ân geh ndăn rnôk bri nar ueh gay ma nkra “3 ca 4 kíp”, nau ê nkra ân geh đăp mpăn nâp, tâm di, nâp, ueh ndrel răk kloh ntŭk ntu, mô ân geh nkol tơm prăk kan, đăp mpăn ueh nâp rnôk pah kan bah công nhân ndrel nŭih ƀon lan, njrăng rdâng nau mô tâm di, sa khâm, mpŭng lir./.