Nar 16.1, tâm bôk nău pah kan ta Cao Bằng, Thủ tướng Chính phủ Phạm Minh Chính hŏ hăn uănh tât ntŭk nchrăp ƀư trong Cao tốc Đồng Đăng - Trà Lĩnh n'hanh nău an ƀư nkual wăng sa Mpông n'har bri Cao Bằng - ăp suan ntrôl hun hao mhe geh nău dơi têh jong đah n'gor dja. Ta Mpông n'har bri Tà Lùng, nkuâl Quảng Hòa, Thủ tướng Phạm Minh Chính hŏ djăt Bí thư Tỉnh ủy Cao Bằng Trần Hồng Minh mbơh mpeh nău dăp rgum, rƀŏng trong hun hao wăng sa mpông n'har bri Cao Bằng.

Tĭng dăp rgum, Nkual wăng sa mpông n'har bri Cao Bằng lĕ ma du gâl mô lah lam lĕ rngôch rnoh hvi bah 31 xã n'hanh 3 thị trấn n'har bri (bah xã Cần Nông, nkuâl Hà Quảng tât xã Đức Long, nkuâl Thạch An). Thủ tướng lah rjăp, Nkual wăng sa mpông n'har bri Cao Bằng hŏ dơi uănh an dŏng dăp rgum tâm khay 3/2022, aơ lah suan ntrôl hun hao mhe bah n'gor Cao Bằng. Gay ƀư dơi nău dja, Thủ tướng đă n'gor an ƀư du đêt nău kan kơt lor nchrăp rdâk njêng trong n'har bri đăp mpăn, tâm rnglăp, tâm boh, hun hao Việt Nam - Trung Quốc.

Kêng măng 16 /1, Thủ tướng Phạm Minh Chính ndrel mpôl Kruanh rđău kan Chính phủ pah kan đah kruanh n'gor Cao Bằng.

VOV/Nuĭh rblang: Điểu Thân