Thủ tướng uănh năl, rlet rlău 48 năm rdâk njêng, têh kuăng, Học viện Quốc phòng lĕ dơi geh âk nău dơi têh, nău geh khlăy kơt.  Ƀư ueh jăp nău kan mbơh trong kan jŏ jong mpeh nău kan tahen, mât rnă njrăng ngih dak, rdâk njêng ntŭk kan tahen. Mpeh nău kan tơm khlăy tâm let năp tay, Thủ tướng đă Học viện mât rnă njrăng ngih dak an geh uănh nđôi gĭt na nê̆, gĭt di, gĭt ngăch đah nău kan ta lam ntur neh, ta nkual gay ma mbơh an Đảng ngih dak mpeh nău kan tơm jŏ jong ntŭk lah nău kan ntŭk lah nuĭh kan, gay ma mô geh wĭ wĕ mpeh trong kan. Ƀư ueh jăp nău mbơh kan, trong kan, uănh khlăy nău kan nglôch lôch, mĭn uănh, ƀư lôch mpeh lý luận, khoa học, nghệ thuật mpeh nău kan tahen, mât rnă njrăng ngih dak, n’hao nău mĭn kan ueh di, nchroh nău mhe, gay ma geh nău ntrŭnh, trong kan tơm an hun hao neh dak, yơn an geh mât nău đăp mpăn, pah kan êng. Nkre lah, ntrôl dăng mĭn uănh, dăn đă ăp trong kan hun hao wăng sa rêh jêng ndrel đah mât đăp mpăn rnă njrăng ngih dak, rnă njrăng nchră nău đah dak bah dih.