N’glôn jêh rƀŭn nchră, Tổng Bí thư Nguyễn Phú Trọng lah rjăp, nău ƀư tĭng ntĭm đă mrô 19 n’hanh ơm an ntĭm rđău du đêt nău kan khlay lĕ kơl gưl ủy, n’gâng kan ƀon lan ăp gưl ngăch  nchrăp uĕh ăp nău khlay gay nuĭh ƀon lan răm wơt têt uĕh lăng, đăp mpăn, ntêm nkrem; geh mông nar răm m’ak, tâm rnglăp, tâm kơl, bôk năp ƀư dơi nău rƀŏng nău kan năm mhe 2023.

Ta ntŭk rƀŭn nchră.

Nkoch tât nău kan êp tât, Tổng Bí thư Nguyễn Phú Trọng lah, an nchroh mbơh nu nău, gĭt ăp nău dơi geh gay geh trong mkra rdâng, mô an tât ndal thơ tha. Jêh rlu Tết, rgum ntĭm rđău, ƀĭt joet, ƀư tĭng rjăp, săk rnglăy ăp nghị quyết, nău ntĭm đă, n’glôn jêh bah Trung ương n’hanh gưl ủy ăp gưl. Tĭng ngih pah kan, nsrôih ƀư dơi ăp nău rƀŏng kan bah năm 2023, năm bôk năp bah năm kan Đại hội 13 bah Đảng.