Ôi lơ 12/1, ta ntŭk kan Trung ương Đảng, Tổng Bí thư Nguyễn Phú Trọng, kruanh rnâng kan ntĭm leo rơh rƀŭn nchră tal 23 bâh rnâng kan ntĭm leo trung ương mpeh njrăng, rdâng sa nkhiăn sa ƀer, mpŭng lir gay ma tâm nchră, an tâm rgop mpeh ăp nkô̆ nău khlăy.

Rnâng kan ntĭm leo lĕ nduĭh uănh nău  geh pah kan năm 2022, bôk nău pah kan năm 2023 bâh rnâng kan ntĭm leo. Nău geh ntĭm đă rmal ăp nău tât, nău kan bâh rmôt kan ndơn kan ntĭm leo uănh nđôi, ntĭm đă bâh rơh rƀŭn nchră tal 21 bâh rnâng kan ntĭm leo tât aƀaơ. Ta rơh rƀŭn nchră,, bâh nău tâm nchră, rnâng kan ntĭm leo dơn ngoăy uănh năl, năm 2022, nău kan njrăng, rdâng sa nkhiăn sa ƀer, mpŭng lir geh ntrôl dăng tay, geh njoat kan mhe, răng dăng, tâm ban lĕ rngôch n’hanh săk rnglăy lơn đŏng. Ngăn lah ndrel đah nău kan njrăng, rdâng sa nkhiăn, sa ƀer nău kan mô ueh đah nău kan cán bộ, rmal răng dăng nău tih, nglưh nău kan, rlu kan tĭng nău ntrŭnh bâh Đảng, ngih dak, an tay nău ueh, ndâk nsơm tay âk nău knơm bâh ƀon lan, ntop dŭt khlăy ta nău ƀư tĭng nău dơi kan wăng sa- rêh jêng năm 2022.