Lôch rlău 3 mông mpăr, ta rnôk 1 mông 20 mnĭt kêng măng nar 30/10 tĭng mông ta ntŭk, bôk ndeh păr rdeng Tổng Bí thư Nguyễn Phú Trọng n’hanh mpôl Đại biểu gâl têh Việt Nam lĕ jur ta tach ndeh păr lam ntur neh Bắc Kinh, ntơm rơh tât khâl dak CHND Trung Hoa tĭng nău jă bâh Tổng Bí thư Ban chấp hành Trung ương Đảng Cộng sản Trung Quốc, kruanh dak CHND Trung Hoa Tập Cận Bình.

Rơh tât khâl ngăn bâh Tổng Bí thư Nguyễn Phú Trọng tĭng nău jă bâh Tổng Bí thư, kruanh dak Trung Quốc Tập Cận Bình geh ƀư lôch Đại hội đại biểu lam dak tal 20 Đảng cộng sản Trung Quốc lĕ lôch ueh, rnâng kan leo kan mhe lĕ geh mbơh tơih n’hanh đồng chí Tập Cận Bình geh săch ƀư tay Tổng Bí thư năm kan tal 3. Nău Tổng Bí thư Nguyễn Phú Trọng jêng nuĭh leo kan dak bah dih bôk năp tât khâl Trung Quốc an saơ nău khlăy bâh nău tâm boh kan đah Trung Quốc n’hanh Việt Nam tâm ban kơt đah Đảng cộng sản Trung Quốc lah nău an lor bôk năp tâm nău kơl kan đah dak bah dih, ŭch hun hao jŏ jong, đăp mpăn, ăp nar lơ ma săk rnglăy. Lôch rơh vơt, Tổng Bí thư bar dak ƀư rơh tâm nchră gâl têh n’hanh râng rơh tâm ton âk nău kan khlăy.