Kêng măng 31/10, ta Đại lễ đường Nhân dân, lôch lễ wơt ngăn, Tổng Bí thư Nguyễn Phú Trọng hŏ geh rơh tâm nchră đah Tổng Bí thư, Kruanh dak Trung Quốc Tập Cận Bình.

Tâm mông nar nuih n'hâm uĕh lŏng ngăn,  sŏng dăng, bar kruanh rđău kan tâm ôp mpeh nô nău bar Đảng, bar dak n'hanh  tâm boh đah bar Đảng, bar dak. Tổng Bí thư Nguyễn Phú Trọng lah rjăp, Việt Nam n'hanh Trung Quốc lah bar dak tâm kâng n'har bri dak yôk nor tâm ntêng lêng nsum njok jong, lah dak xã hội chủ nghĩa da dê tă bah Đảng Cộng sản rđău kan. Bar ding tâm ban ŭch mât trong way tâm khâl gưl têh đah kruanh rđău kan bar Đảng, bar dak gay n'hao dăng tâm gĭt wât nsum, năn ngăch tâm ôp tâm rgâl, nkra ăp nkô̆ nău ntoh luh tâm boh bar ding, mât nău tâm rnglăp n'hanh jâng nsan hun hao kloh rsang, đăp mpăn tâm boh Việt - Trung.

Tâm rơh rgum nchră, bar Tổng Bí thư hŏ tâm ôp jru mpeh ăp trong kan tâm boh ngăn ngăn, tâm ban ŭch ân ntrôl dăng, n'hao nău dơi tam tâm boh ta ăp trong kan wăng sa, tăch rgâl, ntuh kơl, njêng jâng nsing nâp an hun hao tâm boh bar ding; lah rjăp Việt Nam – Trung Quốc lah băl tâm boh tăch rgâl dŭt khlay n'hanh săk geh âk nsum. Tổng Bí thư, Kruanh dak Trung Quốc Tập Cận Bình lah rjăp Trung Quốc mbra nsrôih gay mât jâng nsan hun hao tâm boh tăch rgâl Trung Quốc- Việt Nam tĭng trong rƀŏng nar lơn ma geh nău  tâm ban; nta trong dơh an Việt Nam tăch n'gluh ăp ntil  ndơ tuch tăm, tui ka lăp ntŭk tăch rgâl Trung Quốc tâm let năp tay.