Kêng măng ntri (16/12) ta Hà Nội, Tổng Bí thư Tô Lâm, Bí thư Quân ủy Trung ương hŏ tât râng n’hanh ƀư tơm tâm nchră Quân ủy Trung ương tâl XII. Lôch rnôk djăt siƀŭt mbơh rtŭt lam lĕ rngôch n’glôch jêh pah kan tahen, njrăng n’gang neh dak năm 2024, ăp đại biểu hŏ rgum tâm nchră uănh năl lôch jêh geh rđău đă tĭng ƀư nău dơn kan tahen, njrăng n’gang neh dak năm 2024, tâm nchră n’hanh n’glêh an tâm nchră ăp trong nchrăp, trong nkra rđău đă tĭng ƀư nău dơn kan năm 2025…

Tổng Bí thư Tô Lâm dăn đă, Quân uỷ Trung ương, Bộ Quốc phòng rgum an ôp uănh lam lĕ rngôch ăp rnoh tât kan, nău dơn kan dơi Đại hội XIII bah Đảng, Đại hội Đảng bộ Quân đội tâl XI ntrŏng, geh trong nkra lĕ n’hâm suan, đah nău nsrôih tât dơi ơm. Lah kloh, ndrel đah rđău đă tĭng ƀư geh nău dơi nău dơn kan chính trị rgum tơm, ăp rêng kan đăt ndal, nău dơn kan way ƀư mbro, Quân ủy Trung ương ân êng uănh khlay rđău đă rdâk njêng Đảng bộ tahen kloh rsang, nâp dăng, ntĭt leo lor, ntoh lư tâm lam Đảng.