Tĭng ƀư bôk nău kan mâp cử tri lôch rơh hop tâl 8, Quốc hội khoá XV, kêng măng ntri (2/12) ta Hưng Yên, Tổng Bí thư Tô Lâm ndrel mpôl đại biểu Quốc hội n’gor geh rơh mâp đah âk mpưm ăp cử tri ta nkual ƀon têh Hưng Yên gay mbơh lôch jêh rơh hop tâl 8 n’hanh ơh ăp nău dăn đă bah ăp cử tri njuăl tât Quốc hội.

Lôch rnôk djăt ntơh măt mpôl đại biểu Quốc hội n’gor Hưng Yên mbơh ăp nău dơi ntoh lư bah rơh hop, âk mpưm ăp cử tri ta nkual ƀon têh mpơl nău rhơn Trung ương, Quốc hội, Chính phủ mbra dăp rgum tay nhih pah kan Đảng, Ngih dak. Lah rjăp, aơ lah trong nchrăp di n’hanh mbra lah rơh rgâl gay glêh tam nuĭh kan ngih dak, n’hao nău tam kan bah nhih pah  kan ngih dak, nkre đah n’hŭch biên chế, hŭch prăk mât trong kan chính trị bah Trung ương tât n’gor, rgop n’hao geh âk tơm prăk ngân sách ngih dak an ntuh kơl hun hao n’hanh tĭng ƀư trong kơl đăp mpăn lam rêh jêng kon nuĭh.

Kêng măng ndrel nar, Tổng Bí thư Tô Lâm hŏ tât khâl pă nklâm ndơ Mai Văn Vĩnh, 73 năm deh, tahen ơm rmanh 81%, rnăk nuĭh geh n’hâm suan ta xã Liên Phương n’hanh rnăk wa Bùi Thị Kiêng, deh năm 1940 ta trong Bạch Đằng, phường Minh Khai rnăk jêr jŏt geh âk nău nsrôih tâm nău rêh.