Nkah ndray 80 năm Nar njêng Mpôl tahen ƀon lan Việt Nam, 35 năm Nar rgum lam ƀon lan njrăng n’gang neh dak, kêng măng 18/12, ta Hội trường Bộ Quốc phòng, Tổng Bí thư Tô Lâm, Bí thư Quân uỷ Trung ương tât râng n’hanh ƀư tơm rơh mâp măt, rgŏ jă rơh mom ndăm tâm mpôl tahen.

Nkoch bri dêh bên ăp nuĭh ntơh măt druh ndăm tâm mpôl tahen ntoh lư, Tổng Bí thư Tô Lâm lah rjăp, tâm du njăr trong jong lịch sử 80 năm aơ, ăp rơh kơn druh ndăm mpôl tahen way ndjôt suan mom, lĕ nău gĭt blău, bôk rngok, đah han săk n’hanh rôih dăng, lĕ nuih n’hâm rhŏ dŏng neh dak, rhŏ dŏng an ƀon lan, dâk chŏl lor, mô plơ̆ rŭch bah năp ăp nău klach rvê, n’glăp săk hăn ăp ntŭk tât, moh ntil nău kan ma neh dak n’hanh ƀon lan ŭch geh. Lah rjăp, neh dak he dôl dâk bah năp trong dơh soih chuat lăp tâm rơh hun hao mhe, rơh hun hao, ndrŏng dăng; Tổng Bí thư an lah, ăp nău mpŏng nê, nău nđơr geh nê nsing dŭt têh tâm mpôl druh ndăm, tâm nê druh ndăm Mpôl tahen geh nău kan dŭt khlay, lah n’gâng tơm, leo lor bôk năp. Đảng, Ngih dak n’hanh ƀon lan dôl mpŏng kâp, nơm dŭt têh tâm nău đăt ndal, nău nsrôih hun hao, “rlău dơi săk nơm” bah druh ndăm mpôl tahen.