Ôi nar 18/12, ta Hà Nội ƀư rgum hop rgum lĕ rngôch Đại hội đại biểu lam dak Hội Liên hiệp druh ndăm Việt Nam tâl IX, năm kan 2024 - 2029. Tổng Bí thư Tô Lâm tât râng n’hanh geh nău rđău đă Đại hội. Đah nuih n’hâm “Druh ndăm Việt Nam, rŏng dak – nđơr geh – tâm rnglăp – dâk leo lor – blău njêng mhe, han săk lăp tâm rơh hun hao mhe”, đại hội geh nău dơn kan uănh năl lôch jêh pah kan Hội n’hanh trong leo druh ndăm năm kan 2019 - 2024, rdâk njêng rnoh tât kan, ntrŏng nău dơn kan, trong nkra pah kan Hội n’hanh trong leo kan druh ndăm năm kan 2024 – 2029.

Lah rđău đă ta Đại hội, Tổng Bí thư Tô Lâm lah rjăp, tâm ăp rơh cách mạng, Đảng he êng uănh khlay tât pah kan druh ndăm. Tổng Bí thư dăn đă, ân dơn ngoăy  nău gĭt êng mpeh nău khlay kan bah druh ndăm n’hanh nău khlay mha êng bah pah kan druh ndăm tâm rơh cách mạng mhe bah Đảng, bah rnoi nuĭh. Tổng Bí thư đă rgâl mhe dăng pah kan Hội, Đoàn; rdâk njêng rmôt cán bộ Hội, Đoàn nâp dăng; ntrŏng kloh nău dơn kan bah Hội, ăp mpôl lăp kan nsum bah Hội, Đoàn druh ndăm Cộng sản Hồ Chí Minh tâm pah kan ntĭm nti trong sŏng di cách mạng, njrăng bah hŭch hêng nuih n’hâm uĕh lŏng, trong gŭ rêh tâm druh ndăm, kon se nti, sinh viên.