Ôi 16/12, Ban Tổ chức Trung ương ƀư tâm nchră lam dak n’glôch jêh pah kan leo ƀư rdâk njêng Đảng năm 2024, an ƀư nău dơn kan năm 2025. Lah rđău đă ta rnôk tâm nchră, Tổng Bí thư Tô Lâm rnê ăp nău dơi bah lam n’gâng kan leo  ƀư rdâk njêng Đảng, ntơm bah nău nsrôih nsŏng kơl lam lĕ rngôch trong tĭng pah kan rdâk njêng rmăn glêh tam Đảng, mô lah pah kan cán bộ lơn lah cán bộ tơm khlay tŏng nuih n’hâm uĕh lŏng, nău dơi kan, nău nsing nơm, têh tâm ban nău khlay kan…

Tổng Bí thư đă, lam n’gâng kan leo ƀư rdâk njêng Đảng nsŏng kơl tay, dăn đă rdâk njêng nuĭh kan chính trị glêh tam, kan geh nău dơi tâm nê nău khlay kan bah Nuĭh mât bôk kan gưl uỷ lah dŭt n’hâm khlay. Nkoch kloh rnoh ŭch tât ƀư glêh tam nuĭh kan kơl nău kan rhung ngăch đêt nuĭh yơn nha hôm lôch jêh uĕh nău dơn kan dơi jao đŏng, rƀŏng tât nău ŭch geh dŭt âk lah nta ăp trong dơh an doanh nghiệp n’hanh nuĭh ƀon lan. Tổng Bí thư Tô Lâm dăn đă, ndăn ôp uănh lam lĕ rngôch ăp Quy định bah Đảng, rgâl nkra kơi ntop, n’gluh an dŏng ăp quy định mhe mpeh nău dơn kan, nău dơi kan, leo ƀư nuĭh kan, tâm boh pah kan, trong tĭng pah kan bah gưl uỷ ăp nhih pah kan, đơn vị đăp mpăn dơn ngoăy, ăp kôp bah Trung ương tât tâm dâng.