Ndơn nau jă bah Kruanh dak Nguyễn Xuân Phúc, Tổng thư ký Liên hợp quốc Antonio Guterres khâl ngăn dak Việt Nam ntơm lơ 21-22/11/2022. Kêng măng 21/10, nau vơt ngăn hŏ geh ƀư ueh ta Ntŭk kan Kruanh dak. Jêh nar vơt, Kruanh dak Nguyễn Xuân Phúc hŏ tâm nchră đah Tổng thư ký Liên hợp quốc. Tâm nar tâm nchră, Kruanh Nguyễn Xuân Phúc lah rjăp ăp nau ntoh lư, geh nau khlay ơm bah Việt Nam tâm nau hun hao neh dak, lah rjăp ntrong kan tâm nchră đăp mpăn, ƀư tơm, âk ding nau geh ndơ, nchrăp ndrel nsôih ngăn tâm rnglăp lam ntur neh bah Việt Nam.

Tổng thư ký ntoh nau ŭch rŏng, rnê ryơk ngăn ân an Kruanh Hồ Chí Minh ndrel Việt Nam tâm nau kan lơh rdâng, rklaih rnoi mpôl ndrel ndâk tay neh dak, rhơn ăp nau dơi geh khlay bah Việt Nam tâm nau njrăng rdâng srê Covid-19, ndâk ndrel hun hao văng sa, rêh jêng, rnơm lah Việt Nam mra lŏ ntrŭnh ƀư ân săk tam ăp nau kan văng sa, sŏk ƀon lan ƀư tơm, mât ntŭk ntu gŭ âm, rdâng đah nau rgâl mhe trôk nar, jêng nau dơi geh ueh bah ăp dak êng kơt tĭng nti./.

VOV/Nŭih rblang: H’Thi