Ta ntŭk yŭr mham bah Khoa Xét nhiệm, Ngih dak si Đa khoa Nkual Tây Nguyên, wa Nguyễn Trọng Tân (xă Trường Xuân, n’gor Lâm Đồng) dôl gŭ kâp nuĭh geh rmôt mham khlay tât yŭr mham gay kơl săm ur. Wa nkoch, ur geh u xơ tử cung, âk rơh hăn but uănh yơn nai dak si đă sa kah gay n’hao rnoh mham yor mham đêt mô dơi rek, yơn wa lŏ lah rmôt mham khlay jêng mô geh dak mham ntop.

Nai dak si đă rgŏ jă nuĭh bên hăn yŭr mham, lah mô geh rmôt mham nĕ ri rgâl, yŭr mham hôm ri nai dak si đă aƀaơ tâm ntŭk mô geh rmôt mham nĕ ma rgâl jêng aƀaơ an bĭch kâp. Bĭch kâp ri đă mpeh câu lạc bộ kuăl jă ri nar nđaơ geh du hê, nar aơ geh tay du hê tât.

Tâm nkual săm bah Khoa nhi Tổng hợp, wa Đào Thị Mai ta xă Ea Knốp, n’gor Đắk Lắk ndơ̆ mon bu ur 8 năm deh geh chrai mham bah ndŭl me hăn chuh ntop mham. Lôch 3 năm aơ, du khay 2 u sau lŏ tât ngih dak si gay chuh ntop 2 đơn vị mham. Rơh aơ, mham mpêt, wa an đă ăp nuĭh ŭch êng ntop kơl.

Rnôk mbrơi mô geh mham mon nho ji ol jâng ty, ndŭl pŭk, way măt. Gâp an ndơ̆ mon du khay du tơ̆ hăn Ngih dak si đa khoa nkual Tây Nguyên. Rnôk aơ, ngih dak si mpêt mham gâp an dăn mham bah ăp yơ đại học Y dược yŭr mham kơl an.

Tĭng nai dak si Đặng Việt Nam-Khoa Nhi tổng hợp, Ngih dak si Đa khoa Nkual Tây Nguyên, êng khoa aƀaơ săm an nklăp 100 kon se ntưp ji chrai mham ndŭl me. Rĭng du hê kon se ŭch chuh ntop mham nklăp 1-1,5 khay/tơ̆, geh nuĭh mbăn an chuh ntop 2-3 pơh/tơ̆. Du rơh, nklăp 40-50 mon ŭch chuh ntop, âk oh an geh 2-3 đơn vị, tâm ban bơi 1 lít mham.

Ŭch mham hao âk yơn mô geh mham. Mô di du mon chuh ntop du dŭng mham ma geh mon chuh ntop 2 tât 3 dŭng. Yor ăp mon rlău 10 năm rnoh kí oh jêt âk, rnoh mham chuh ntop ŭch du tơ̆ âk lơn. Nău ŭch aƀaơ dôl dŭt khlay.

Rĭng du khay, ăp ngih dak si ta n’gor Đắk Lắk ŭch bơi 2.000 đơn vị mham gay săm ndal n’hanh săm ngăn, tâm nĕ Ngih dak si Đa khoa Nkual Tây Nguyên geh dŭt âk. Trung tâm huyết học n’hanh Truyền máu ŭch đêt ngăn 500 đơn vị mham ntêm nkrem gay tŏng rdâng nu nău ndal. Yơn lah, bah bôk khay 7 tât aƀaơ, rnoh mham wơt dơn mô tŏng, ƀư nu nău mô tŏng jêng lơ hô.

Ta năp nu nău tu tơm mham ntêm nkrem rhŏ an săm ndal n’hanh săm ngăn ta ăp ntŭk dak si mô tŏng hô, UBND n’gor Đắk Lắk lĕ geh samƀŭt n’hao trong kan rgŏ jă yŭr mham ŭch êng. Ndrel đah nĕ, Ngih dak si Đa khoa Nkual Tây Nguyên geh samƀŭt mbơh kuăl jă nuĭh ƀon lan râng yŭr mham ŭch êng. Nai dak si H’Nương Niê-Kruanh Khoa Xét nhiệm, Ngih dak si Đa khoa Nkual Tây Nguyên an gĭt:

Khoa lĕ mbơh đah Ban Giám đốc gay râng ăp trong mkra, bôk năp Khoa mbra wơt dơn mham ta Khoa bah nar ngoăy tât nar prăm n’hanh ƀư lôch nung nar, nar ngoăy tâm rgop đah Trung tâm huyết học truyền máu gay rgŏ jă yŭr mham ŭch êng; nar bar lah kuăl jă lĕ rngôch đoàn viên ta lam ngih dak si râng yŭr mham kơl nuĭh. Đah bôk năp Ngih dak si lĕ geh rnoh mham gay rhŏ an ăp nuĭh ji săm ndal ta ngih dak si.

Tâm rnôk khar mpêt mham jŏ jong, nău lăp ngăch bah n’gâng kan ƀon lan, nău kan dak si n’hanh nsum mpôl lah nkô̆ nău ntrŭnh an mât nău rêh an hang rhiăng nuĭh ji. Du đơn vị mham an an mô knŭng kơl rlet rlău nău klach bah năp măt ma hôm lah nkô̆ nău ƀư uĕh rêng hvi nuih n’hâm mbra tâm pă ta nău rêh kon nuĭh.