Mon N.N.Đ (3 năm) ta xă Ea Kuêč, n’gor Đắk Lắk geh luh mham muh, siăk, hok luh n’hak, blao sa. Rnăk wâl lĕ rwăt dak si sĭt săm yơn ji mô bah ma hôm mbăn lơn jêng lĕ ndơ̆ mon hăn Ngih dak si Đại học Y Dược Buôn Ma Thuột but uănh. Ta aơ, mon dơi nchroh ntưp ji klơm soh. Yuh T.T.H, mê̆ mon nkoch:

Ta jay mon geh siăk, hok luh n’hak, mon mô ŭch sa. Jêh 2 nar saơ nu nău mbăn lơn jêng oh geh rwăt dak si ta bah dih an mon ngêt. Ngêt dak si du nar yơn saơ mon mô hŭch, rnôk nĕ mư an ndơ̆ mon hăn Ngih dak si Đại học Y Dược Buôn Ma Thuột. Tâm rnôk bĭch săm ta ngih dak si mon ŭch nău ngêt dak si. Ta jay u che, me bơ̆ dŏng ăp trong ma mon mô ŭch ngêt, hôm hăn ngih dak si ăp nai dak si an ngêt dŭt dơh. Tât aƀaơ mon lĕ bah siăk, hŭch n’hak, săk soan kon bah lơn, săk ngăch lơn hôm.

Tâm ban nău bah rnăk wâl nô N.T.T ta xă Quảng Phú, n’gor Đắk Lắk Nklăp rlău 10 nar bah năp, rnôk saơ mon (7 khay deh) geh siăk, duh, rnăk wâl nô N.T.T lĕ ndơ̆ kon tât ngih dak si Đại học Y Dược Buôn Ma Thuôt tâm măng dâl. Ta aơ, mon dơi nchroh geh ji klơm soh yor ntưp kaman RSV (kaman trong n’hâm). Nô N.T.T an gĭt:

Ta jay mon siăk âk, duh jêng rnăk wâl ndơ̆ mon tât ngih dak si but uănh. Rnôk mon ntơm siăk 2 ur sai lĕ ndơ̆ kon tât ngih dak si gay but uănh n’hanh sŏk dak si sĭt ngêt. Ngêt dak si đêt nar saơ siăk bah mon geh hŭch yơn mon lŏ geh duh, 2 ur sai lŏ an kon hăn but uănh n’hanh dơi nai dak si nchroh mon geh ji klơm soh an lăp ngih dak si. Jêh 3 nar mon săm ta ngih dak si, săk soan bah mon lĕ bah lơn, saơ siăl lĕ hŭch, duh hŭch đŏng lơn.

Bah bôk năm 2025 tât aƀaơ, ngih dak si Đại học Y Dược Buôn Ma Thuột lĕ wơt dơn n’hanh săm an bơi 12.00 kon se ntưp ăp ji mpeh trong n’hâm. Êng ji klơm soh bơi 3.000 nuĭh, geh 25%. Tĭng ăp nai dak si chuyên khoa, ăp nar dăch aơ, trôk nar duh mih ndal ƀư an rnoh kon se mpeh trong n’hâm hao. Ji klơm soh lah ji way mâp yơn lah mô dơi nchroh di, săm ngăch dơi ƀư du đêt nău rgâl klach, khuch têh tât săk soan, đê̆ đŏng nău rêh kon se.

Ji klơm soh geh tât dŭt âk tât nkô̆ nău trôk nar n’hanh ntŭk ntô gŭ âm, ngăn lah ji klơm soh yor ntưp kaman RSV (kaman trong n’hâm). Ji hao rnôk trôk rgâl nđik n’hanh mih âk. Rnôk aƀaơ hin, n’ĭt bah dih trôk hao âk, lah me bơ̆ mô mât răm uĕh an kon se, ngăn lah bah dâng 2 năm, kon se dơh ntưp ji klơm soh. Bah meng nĕ, lah ntŭk ntô gŭ rêh geh n’hôl ƀô mô dah way geh nsuk hât, kon se dơh ntưp ji. Nai dak si CKI Trần thị Liễu Chi, khoa Nhi, Ngih dak si Đại học Y Dược Buôn Ma Thuột an gĭt:

Kaman RSV lah ntil kaman way mâp tâm yan mih. Ta bah dâng n’hanh Tây Nguyên ji klơm soh ntưp kaman RSV way mâp bah khay 5 tât khay 9 ăp năm, way mâp ta kon se bah dâng 2 năm n’hanh ƀư geh ji klơm soh mbăn.

Tĭng ăp nuĭh way kan dak si, ngih dak si klơm soh lah nuĭh way mâp ta kon se, ngăn lah ta kon se bah dâng 2 năm deh. Yơn lah, mô di lĕ rngôch ăp nuĭh kon se geh ji klơm soh da dê an lăp ngih dak si ma tĭng tâm rnoh bah ji. Me bơ̆ an ndơ̆ kon se hăn but uănh ta ăp ngih dak si geh chuyên khoa nhi gay dơi nai dak si ntĭm trong mât chăm, n’ăp lăp ngih dak si mô lah săm ta jay. Ta ăp rnoh ji, ăp kon se mbra dơi ntĭm trong săm êng êng. Mô dơi an rwăt êng dak si an kon se ngêt, yor klach mâp nău rgâl âk lah dŏng mô di dak si n’hanh trong săm./.