-Dăn nai dak si mbơh nkô̆ ƀư ji klơm soh?

            Nai dak si Trần Thị Liễu Chi: Ăp nau ƀư jêng khuch bah nau ji trong sŏ n’hâm lah nsum ndrel ji klơm soh lah êng tâm kon se, ngăn lah kon se tâm dâng 5 năm lah yor geh nau khuch têh ngăn tât ntŭk gŭ ndrel duh n’ik. Nau ji klơm soh mra hao âk rnôk ma bri n’ik mô lah mih âk. Rnôk aơ bri rlĭt mbĕ hô nê lah nau nơih ân kman lơh nau khuch ji klơm soh hô. Êp nê, ăp nau tât khuch ba lơ nê ri nau khuch tât ntŭk gŭ, ndrel ma nau geh n’hơp n’huk hât lơn ma ƀư kon se geh nau ji klơm soh, ngăn lah kon se jê̆, kon se tâm dâng 2 năm.

            -Ơi nai dak si, rnôk kon se ji klơm doh ri mra geh moh nau mpơl. Nau ji mhâm geh jêng?

            Nai dak si Trần Thị Liễu Chi: Rnôk geh nau ji klơm soh lah nsum ndrel ntiwp ma kman RVS lah êng, tâm 2 nar bô năp, kon se mra geh nau mpơl kơt lah ji nuih lơh dơm dam, kơt si-đeh, săk ndrel luh dak muh. Yơn nau ji mra khuch ngăch tâm ăp nar êp nê, kon se mra geh ăp nau mpơl kơt lah sŏ n’hâm lêt, sŏk n’hâm geh n’hak, nchlơi sa, mô ŭch pu toh, ji kop duh hô. Nau ji klơm soh jâk ri ân geh kơl an sŏ n’hâm ma Oxy, kơl an sŏ n’hâm tâm kon se.

            Rnôk geh nau ji klơm soh, lah mô geh năl ndrel săm năn ri mra geh mâp ăp nau khuch tât trong sŏ n’hâm. Vay lah ăp kon se geh ăp nau mpơl kơt lah rgănh, uănh săk jăn mô ngăch, ân sŏ n’hâm ma ôxy, geh rnôk ri ân kơl máy ân kon se sŏ n’hâm, ƀư kon se rgănh, lơi sa, lơi pu toh...du đê̆ kon se ri mra khuch tât trong mham đŏng.

            -Ơi nau dak si, moh nau mpơl saơ ân geh nkah đah nau ji klơm soh tâm kon sa gay ma njrăng nau mbăn lơn?

            Nai dak si Trần Thị Liễu Chi: Rnôk saơ kon se siăk, ji kop duh, sŏ n’hâm jêr, ngăch, lêt, lơi sa, lơi pu toh...me mbŏ na leo kon hăn ngih dak si gay khám. Me mbŏ mô dơi rvăt êng dak si ân ngêt tâm ngih. Rnôk tât ngih dak si khám ndrel săm, me mbŏ ân kon nơm ngêt dak si tŏng di ndrel tĭng nau đă bah nai dak si, mô dơi rgâl êng dak si ngêt ân kon se.

            -Moh nau ƀư gay ma njrăng ji klơm soh tâm kon se ơi nai dak si?

            Nai dak si Trần Thị Liễu Chi: Nau ji klơm soh lah nau ji geh tât nau khuch bah n’ik, duh, ntŭk ntu gŭ ri ma me mbŏ ân geh nkah tât nau rgâl bah mih, nar, kơt lah bri n’ik ri nơm ân kon nsoh răm, rnôk kon se hăn luh bah dih ân put bok put mbung. Đah nau ngêt sa, ân kon se sa tŏng kah 4 ntil kơt lah: rnoh phe, đạm, sĭk, vitamin ndrel khaongs chất kơl kon se n’hao nau dăng săk. Ân kon nơm geh tŏng chuh dak si ndrel tâm di nar ăp ntil vắc xin. Đah kon se tâm dâng 6 khay ân kon nơm pu toh me, sa hơm, tŏng tâm di. Rnôk kon se geh ji klơm soh yơn lah mô jâk, nơm săm tâm ngih ri ân nkah tât nau ngêt sa ân kon, n’hao ndơ sa ân kah ueh ân kon se. Đah kon se mô ŭch sa, lơi sa, lơi pu toh, rgănh geh nsum ma mô ueh tâm trong proch, kơt lah luh hok ri ân kon sa por, nơh lêt, mô sa ndơ ngi, mô dơi lêk, ndơ nik. Rnôk ân kon ngêt dak si ri ân tĭng nau đă bah nai dak si, mô dơi dah ma rgâl dak si êng, ngêt kơt êng, mô ân mô hôm ngêt dak si.

            -Ơ, dăn lah ueh nai dak si./.