Bah rnôk ndrâm dak buôn K’Li A (phường Đạt Hiếu, nkual têh Buôn Hồ, n’gor Dak Lak) dơi ƀư plơ̆ tay, bôl jay lĕ geh ntu dak yơn  yuh H’ En Niê hôm e hăn ndrâm dak, H’En dơi mê̆ ntĭm an nău kan ƀư ndrui gay n’gôn ndrănh. Yuh H’ En lơ răm rnôk gĭt ƀon nơm mhe ndâk njêng hợp tác xã lŏ mir way nkra njêng ăp ntil ndơ way ơm, tâm nĕ geh ndrănh yăng. Jêh nĕ lah ndơ ndrănh yăng OCOP buôn K’Li A mô knŭng dŏng tâm ăp rơh răm bah ƀon, nar rgum bah phường ma hôm rhŏ năch uănh nsong, n’hanh rêng hvi tât ăp nkual lam dak.

Gâp mpŏng ăp gưl n’gâng kan ƀon lan gay pơk ăp jrô ntĭm an kon se tâm ƀon K’Ly A dơi gĭt mpeh ăp nău kan way ơm bah rnoi mpôl đêt nơm. An kon bu ur ri nti cheh tanh, n’gôn ndrănh yăng; kon bu klô ri nti tanh sah dông, nti ăp ntil mboăt n’hôm rnoi he nơm. Geh kơt nĕ mư mât ndrăy ăp nău uĕh văn hóa bah rnoi nuĭh.

Nău rêh bah kônh wa Êđê ta ƀon K’Li A dŭt âk tĭng ƀư lŏ mir, đah ăp ntil tơm tăm khlay lah cà phê, tiêu, sầu riêng. Dêh n’hanh têh ta play neh aơ, wa Y Chép Mlô wât jru ăp nău rgâl hun hao bah tĭng chor jay ŭnh tâm ƀon; Wăng sa nar lơ hun hao, mô hôm rnăk wâl rvê ji ngot, mô tŏng sa, mô tŏng nsoh. Yơn wa Y Chép hôm e rngot rnôk nkah gĭt tât ăp nar ngai, đah nău ŭch djăt ot ndrong, nău nteh chĭng, nteh đinh pút, mô lah du nău nteh peh ba... Lĕ rngôch knŭng tâm nău ơm dŭt ngai dơi rdâk njêng, hôm e plơ̆ tay. Wa Y Chép Mlô răm ngăn.

Lĕ rngôch ăp nuĭh tâm ƀon djăt tĭng bu ranh ƀon n’hanh kruanh ƀon, gơih ƀư sa jêng wăng sa hun hao, nuĭh ri ntêm geh drăp ndơ. Âk rnăk wâl lĕ ƀư jay kloh uĕh, rwăt ăp ndơ dŏng mhe. Aƀaơ mpôl hên lĕ uănh khlay mât ndrăy nău way ơm bah rnoi nuĭh nơm.

Wa Y Ngia Mlô, Bí thư chi bộ Buôn K’Li A an gĭt tâm rnoh 277 rnăk bah ƀon, knŭng hôm 13 rnăk ach o, geh tât 43 rnăk ndrŏng. Aƀaơ ƀon hôm e 40 jay nhih way ơm. Geh 5 rnăk lĕ nkra, nglăp tay du đêt ndơ gŭ âm ta jay nhih bah nuĭh gay ƀư ntŭk gŭ âm n’hanh rhŏ an ndơ song sa bah năch. Chi bộ mhe nglăp 2 đảng viên, n’hao rnoh đảng viên bah chi bộ hao 17 nuĭh. Aơ lah rmôt tơm tâm nău hun hao wăng sa; jŭt jăng nău rluk mâl, mât nău uĕh văn hóa bah nuĭh Êđê.

Mpôl hên mât ndrăy nău way ơm bah nuĭh Êđê kơt: ƀư brah ndrâm dak, ƀư brah săk soan an nuĭh ƀon lan. Kônh wa ƀư ndrănh yăng, mât ndrăy jay nhih, n’hanh ăp ntil mboăt n’hôm, lơn lah chĭng gông.

Wa Nguyễn Thị Trúc, Bí thư Đảng ủy phường Đạt Hiếu an gĭt: Bôk nău rgop tâm nchră “Hun hao pâl nđaih ntŭk gŭ rêh n’hanh mât uĕh ăp nău khlay văn hóa chĭng gông, hun hao nău kan n’gôn ndrănh yăng jêng ndơ OCOP jêng geh nău tâm ban ŭch bah ăp nuĭh ta ƀon K’Li A. Đảng ủy lĕ jao gưl nău kan ăp nsum mpôl, rmôt kan chính trị bah phường ƀư tĭng. Wa Nguyễn Thị Trúc mĭn lah:

Mât uĕh ăp nău khlay văn hóa đah hun hao pâl nđaih. N’gluh an nău rƀŏng hun hao pâl nđaih ntŭk gŭ rêh kơt mât uĕh nău khlay văn hóa chĭng gông. Hun hao nău kan n’gôn ndrănh jêng du ndơ OCOP gay rhŏ an năch pâl nđaih.

Gay kơl HTX cheh tanh ƀon K’Li A dŏng, Rmôt bu ur nkual têh Buôn Hồ lĕ tâm rgop ntŭk ntĭm nău kan pơk jrô nti cheh tanh, nkre an oh yuh bu ur bah ƀon 3 rpăi tanh. Wa Nguyễn Phạm Minh Tiết, Kruanh Hội Liên hiệp Bu ur nkual têh Buôn Hồ rvê; an moh ndơ ƀư gay dơi geh ndơ cheh tanh, đăp mpăn nău geh an ăp nuĭh? Khân pơng rêh đah nău kan ri nău kan mhe hôm e mât.

Rlău ma nău jao prăk, jao nău wât ti ăp nuĭh bah HTX aơ an geh trong ƀư tăch rgâl săk rnglăy gay ndơ khân pơng ƀư geh mô knŭng gay mpla nsơ ma an dơi tât đah nuĭh dŏng. An geh nuih n’hâm hao êng n’hanh mât nuih n’hâm bah nơm tâm nău mât ndrăy nău uĕh văn hóa rnoi mpôl đêt.

Dơ dak mpôr nđik luh bah trôm neh, t’roch tâm yăng ndrănh lĕ kăt ta n’gâng. Ty nkre djôt tong ndrănh ƀô kah dŭt lăp. Nteh chĭng n’gôr răm bah ăp jay nhih, rêng hvi ăp mir cà phê uĕh nđĭr bah ƀon K’Li A, phường Đạt Hiếu, nkual têh Buôn Hồ.