N’gul tổ 8, phường Ayun Pa, nkual mir jêt bah nô Kpă Sa dôl jêng ntŭk tât ma nuĭh ƀon lan tâm nkoch ăp rnôk ŭch joi du ntŭk đăp mpăn, uĕh tĭng nău way bah Jarai. Bah năm 2018, Sa ntơm nkra nkual neh gay tăm, mât rong, rgâl jêng jâng gung, tĭng ntrong tơm jêng uĕh rep, tâm di. Mô knŭng rlu ta nău ƀư uĕh nkual neh 200m2, Sa hôm nkoch ăp ndơ sa way ơm kơt n’ha bum, blân tăng, trĭch, ăp ndơ dŏng bah nuĭh Jarai... ta mạng xã hội. Ăp video, rup uĕh nĕ lĕ lăp nău răm bah nsum mpôl, gay âk nuĭh joi tât uănh nsong kơt tât du “ntŭk jêt” bah văn hóa ta ntŭk.

Rnôk bôk năp gâp rwê, yor nkual neh bah gâp mô dơi uĕh, jêng lĕ rgâl tăm tay biăp nkra mir m’hâm an nkual mir uănh tâm di uĕh, kloh lơn. Gâp ƀư mir aơ bah năm 2018, tât aƀaơ. Du nar gâp nkra du đêt, ƀư mir mĭn nkual aơ m’hâm ƀư, nkual ri m’hâm ƀư gay uĕh măt uănh lơn, dŭt âk nar an nkual mât rong n’hanh mât tăm, bah ôi tât măng mô lĕ nău kan, ăp nar ƀư gay an mir uĕh lơn, gay ăp nuĭh ŭch lơn.

Sĭt Ayun Pa, hăn xă Ia Ly, ntrong ƀư “Ƀon văn hóa pâl nđaih Jarai” bah yuh H’Uyên Niê dôl kơl rêh tay ăp nău kan way ơm ntôn lah roh. Ntoh bah nău rwê rnôk saơ cheh tanh kho ao, tanh sah mô lah peh ba mbrơi mbrơi đêt dơi jêng tâm nău rêh ăp nar, yuh ndrel du rmôt bu ur tâm ƀon ƀư ăp nău kan ƀư ngăn an năch pâl nđaih. Lĕ rngôch dơi mpla nsơ nsơ săk rnglăy knơm fanpage bah ƀon. Knơm nĕ, bu ur tâm ƀon nkre geh tay prăk, nkre mât nău kan way ơm yor pah kan ăp nar bah nơm. Yuh H’Uyên Niê nkoch:

Khân pơng gĭt tât bah mạng n’hanh fanpage bah ƀon. Ƀon geh du trang fanpage nĕ ƀon pâl nđaih nsum mpôl, rnôk ma năch ôp bah nĕ mô lah tă nău nkoch bah băl bên. Ăp nău ƀư khlay bah ƀon hôm e cheh tanh, sah dông, peh ba, nău ƀư ndơ sa kơt trăm phe, sreh ngâr gay năch tât peh ba tâm dĭng ngâr, gŭch piăng dĭng gay sa moh yan ri an năch ƀư ngăn yan nĕ. Ntĭt nsa kơt rnôk hô ngăn bah dŭt năm nĕ lah peh cà phê dŭm ri năch dơi peh n’hanh check in, chŭp rup.

Lah Kpă Sa n’hanh H’Uyên Niê rêng hvi nău uĕh tă bah ntŭk ntô n’hanh ndơ way ơm, ri Rcom Bus-bu ndăm Jarai 23 năm ta Pleiku săch âm nhạc n’hanh rup gay nkoch Tây Nguyên âk nău mhe. Fanpage “Tarzan Tây Nguyên” bah nô geh rlău 160.000 nuĭh uănh. Ăp clip uh nung n’hanh dak leng mô lah hao yôk tâm kho ao tanh way ơm ta ntŭk. Bus nkoch, bah du he kon se mô nănh, klach djôt điện thoại ntŭk âk nuĭh, nô êp bên đah nău quay vlog n’hanh nsing nơm lơn tă bah tĭng video. Mô nti uĕh, Bus hôm dơi geh uĕh êng. Bah dih têh dăng, sŏk jong, ntô krăk n’hanh nuih n’hâm lŏng nô dơi kuăl lah “Tarzan Tây Nguyên”. Ăp MV hao yôk, nchah rse, pâl chĭng gông bah Bus way wăch hang rhiăng rbăn nuĭh uănh; klip bôk năp geh rlău 200.000 nuĭh ŭch. Bah nĕ, Bus jêng du “ntŭk pâl nđaih” dŭt uĕh.

Gâp mpla nsơ văn hóa n’hanh nău way ơm ta mạng xã hội gay ăp nuĭh gĭt tât ntŭk ntô văn hóa Tây Nguyên geh ăp nău uĕh, nău uĕh ngăn n’hanh âk ntil. Tây Nguyên lah geh du nău tam ngăn, bri neh tâm uĕh. Săk nơm lah nuĭh kon bah Tây Nguyên gâp saơ mô hŏ dơi joi lĕ nkual neh Tây Nguyên aơ, ăp nău nteh chĭng, nău uĕh văn hóa bah nuĭh rnoi mpôl đêt gâp dŭt ŭch n’hanh ntô̆ n’hao rnôk hun hao nău uĕh văn hóa bah nuĭh rnoi mpôl đêt gâp, gâp mpla nsơ an lĕ rngôch ăp nuĭh gĭt tât âk lơn.

Nô Đỗ Đức Thanh, Groi Bí thư Rnâng kan Tỉnh đoàn, Kruanh Hội LHTN n’gor Gia Lai an lah, aơ an saơ na nê̆ nău ƀư tơm bah rgâl mrô đah druh ndăm. Nău mĭn ƀư mhe bah du hê nuĭh mô knŭng kơl khân pơng hun hao ma hôm rêng hvi rup ndah Gia Lai-du nkual âk nău uĕh, dăch dêh, âk nău dơi ƀư pâl nđaih.

Băng: Dơi mĭn lah công nghệ mrô n’hanh mạng xã hội lah ngoăy tâm ăp ndơ dŭt tam nta an ăp băl druh ndăm dơi gĭt tât êp lơn đah văn hóa bah rnoi mpôl đêt, kơt nău ndâk njêng nău kan, nkra njêng êng ăp video clip, rup gay nkoch săk nơm dôl moh ndơ ƀư gay rdâk njêng nău kan. Ăp băl dơi nkoch ăp nuĭh gĭt nău ntô̆ n’hao kơt nău kan nơm dôl ƀư gay ŭch hun hao săk nơm. Tă bah nĕ ăp  băl mpla nsơ đŏng rup ndah ƀon tơm, ƀon lan đah nău uĕh êng gay rup ndah bah ƀon tơm tât đah nsum mpôl, wăch rgum âk lơn tay năch pâl nđaih tât ƀon lan.

Bah nkual mir jêt ta Ayun Pa, tât ăp rpăi tanh ta Ia Ly mô lah nteh nung n’hang n’glôh n’gôr nklang bri Pleiku... Ăp nuĭh mom rnoi mpôl đêt bah Gia Lai dôl nkoch êng nău văn hóa bah ƀon tơm nơm tĭng trong dŭt mhe: mĭn nklah, mhe n’hanh ntô̆ n’hao. Khân pơng lah ăp nuĭh văn hóa Tây Nguyên, rgop khlay ndơ̆ rup ndah Gia Lai dăch lơn đah năch tâm n’hanh bah dih dak.