Rnăk wâl wa Liêng Hót Ka Hiên (nuĭh K’Ho jrŏng Cil) ta thôn Srê Đăng, xă Tân Hội, n’gor Lâm Đồng geh way ƀư ƀanh ơm kăl e, tâm nĕ ƀanh mbo lĕ jêng “moh êng” ntoh lư tâm nkual. Rnôk wa Liêng Hót Ka Hiên âk năm deh, wa lĕ nkoch trêng ăp nău ƀư ƀănh mbo an ăp oh yuh, kon sau tâm rnăk wâl, jêng dơi kuăl nĕ lah ndơ “ƀanh mbo rnăk wâl way ơm”.

Yuh Liêng Hót Zi Jăk kuăl wa Liêng Hót K’Hiên lah yơ. Jêh rnôk tốt nghiệp trung cấp Dược, yuh sŏk nău blău lĕ nti gay ƀư an kah “đah mbo way ơm” bah rnăk wâl ntop kah. Yuh Liêng Hót Zi Jăk, an gĭt:

Ƀanh mbo njŭng, tŏng uĕh kah tĭng tâm ntil mbo. Ƀanh kah ngăn lah ƀănh dơi ƀư bah mbo m’êt bah rnoi nơm tăm êng. N’hanh mbo gay dŏng ƀư ƀănh ri mô dơi kranh ir mô lah nse ir. Mbo di rnoh kranh ri kơt nĕ mô geh lêk mô lah dăng mô dơi rbân.

Nuĭh K’Ho aƀaơ way dŏng ntil mbo m’êt nglang gay ƀư ƀanh. Ntil mbo aơ rbân, kah, săk geh âk lơn n’hanh khay pâk ơm lơn nkôp đah ntil mbo rmĭt. Tĭng nău blău ơm bah kônh wa, ăp play mbo lĕ tŏng nar ri ndăn pâk ta ôi ơm gay geh rnoh kah ngăn. Play mbo jêh rnôk pâk sĭt dơi nkret gâm dâl gay mât lĕ ƀô kah. Ntô mbo dơi dŏng gay nklâm ƀanh. Yuh Liêng Hót Zi Jăk nkoch tay:

Jêh rnôk pâl mbo sĭt, mbo mbra til ntô, jêh nĕ brêh tĭng play n’hanh an măy rpăch, an đêt sĭk n’hanh dak toh. Lah an âk sĭk mô lah dak toh ri mbra roh kah ơm bah mbo. Jêh nĕ mbra sŏk ntô mbo gay nklâm ƀanh n’hanh djôt n’hôl tâm 2 mông lah mbo sĭn.

Ƀanh mbo dŭt dơh ƀư, lĕ rngôch ta ƀon lan, bu ur K’Ho gĭt ƀư ƀanh mbo da dê. Yor nău kan mô ru, ma ŭch dŏng rnoh đêt ƀanh mbo ăp nar, jêng âk nuĭh mô ŭch ƀư êng ma săch hăn rwăt. Bah nĕ, ƀanh mbo mbrơi jêng ndoh ndơ, lah ndơ sa mô knŭng rhŏ nuĭh ƀon lan ta ntŭk ma hôm dơi nchih tăch tâm mạng xã hội. Yuh Liêng Hót Rebeca lah kon bu ur dak bôk bah wa Liêng Hót K’Hiên, rlău ma mông ntĭm nti ta ngih samƀŭt, yuh hôm mât nău kan ƀư “ƀanh mbo way ơm” bah rnăk wâl.

Săk nơm lah du hê nai, dŭt đêt mông nar, yơn gâp hôm e ndăn mông nar gay ƀư ƀanh. Bôk năp lah rgâl nar sa an rnăk wâl, jêh nĕ lah tăch an ăp kônh wa tâm nkual nsĭt tay geh prăk an rnăk wâl. N’hanh khlay ngăn lah mpôl hên lah rơh kon sau an gĭt mât ndrăy nthoi tay nău kan way ơm bah rnăk wâl bah rnoi nuĭh mpôl hên.

Yuh Lơ Mu Liviơ lah du hê năch bên bah rnăk wâ Liêng Hót K’Hiên gĭt saơ:

Ƀanh mbo lah ndơ sa kah bah rnoi nuĭh mpôl hên, ăp nuĭh gĭt ƀư đŏng. Yơn ƀư ƀanh mbo n’hôl n’hanh tăch tơr ri ta ƀon lan aơ knŭng geh du rnăk yuh Rebeca ƀư dơm. Rnăk wâl yuh nĕ ƀư ƀanh dŭt kah, đăp mpăn kloh uĕh, gâp saơ rhơn ngăn yor tâm ƀon geh rnăk wâl nthoi tay n’hanh mât nău kan ƀư ƀanh way ơm bah rnoi nuĭh nơm gay nău kan aơ mô geh roh ma hôm nsĭt tay geh prăk rgâl nău rêh rnăk wâl. Gâp dŭt rnê ăp nuĭh bu ur K’Ho ngăch prăl n’hanh mĭn ƀư mhe kơt gĭt mât n’hanh rƀăy nău kan way ơm bah rnoi nuĭh nơm, tâm nĕ geh nău kan ƀư ƀanh.

Ƀanh mbo bah rnăk wâl wa Liêng Hót K’Hiên ƀư geh lĕ tăch an năch ta ăp nkual bah n’gor Lâm Đồng. Rlău ma nê̆ ƀanh mbo dơi tăch an năch ta bah dih n’gor. Du rơh rnăk wâl ƀư rlău 2000 nklâm ƀanh, du nklâm 20 rbăn prăk... Aơ lah ndơ geh prăk mô hŏ geh âk yơn kơl rnăk wâl wa geh tay prăk. Lơn lah wa saơ ntô̆ n’hao yor lĕ gĭt mât n’hanh hun hao nău ƀư ƀanh way ơm jêng “nău kan way ơm” bah rnăk wâl.