Đag nău mprơ Eirei dŭt ueh nghệ nhâ HBliư̆ Hwing mô dơn ntoh ang tâm ăp rơh răm rhơn, ma khlăy ngăn lah  geh gŏ tât play nuih kon nuĭh tâm ăp nar rngot klâng. Nău mprơ bâh wa geh dŭt ueh ngăn, bâh klâng rngot nuĭh khĭt, tât nău mprơ tâm rŏng bu ur bu klô, lôch nĕ lah nău ŭch rdâk njêng ƀon lan têh ndrŏng. Nghệ nhân H Bliư̆ Hwing nkoch.

“Bâh ntơm kăl e nơh, u che he lĕ mât rbăy nău tâm pât way kơt kơt lah eirei, kưt-ăp nău ueh êng ntoh lư n’hanh dŭt khlăy bâh mpôl rnoi. Mpôl he an geh ryơk n’hanh mât ăp nău khlăy bâh nău mĭn nĕ, mô an roh rui ăp nău ueh êng lĕ geh u che he nklơi tay kơt mprơ eirei, mprơ kưt, uh đinh năm, đinh tut...mprơ eirei way geh tâm rnôk râng khĭt, gay ma ntĭnh nuĭh khĭt. Nkô̆ nău nkoch tay nău rêh nuĭh lĕ khĭt, mpơl nău rngot klâng dŭt n’hâm. Nău mprơ bâh măng tât ôi, mô dơn kahgĭt, ma hôm nha nkoch tay nău ueh mpeh nău rŏng ƀon tơm, n’hanh nău ŭch rdâk njêng ƀon lan ăp nar lơ ma têh ndrŏng, sâm geh.

Nău ŭch rŏng đah njroh mprơ lĕ ơm krêp kă r tâm săk soan nuih n’hâm bah nghệ nhân H Bliư̆ Hwing. N’hanh lĕ rlet rlău âk tâm nău rêh, wa djăt săch ueh ăp nău tâm pêt, nău mprơ.

Tâm nău mpring bâh nghệ nhân H Bliư̆ Hwing geh mpơl ăp nău ueh êng nău rŏng nău ŭch du nău rŏng ueh, lĕ rngôch rnôk mprơ đah bôk nău tâm rŏng.

Oh H Lana Hwing, 12 năm deh, mon bu ur bâh nghệ nhân h’Bliŭ Hwing, rhơn nkoch: ăp tŏ wa mprơ Eirei, wa bu klô gŭ uh đing năm. Nău nteh n’gloh lam jay. Lĕ rnăk gâp ndrel gŭ djăt da dê. Ăp tŏ kơt nĕ, gâp saơ tâm nuih n’hâm rhơn n’hao ryơk ngăn. H Lana an gĭt, ăp rơh kơt nĕ lĕ mât rong nuih n’hâm oh nău rŏng đah nău mprơ rnoi nơm.

 “Gâp dŭt ŭch djăt wa mprơ Eirei. aơ lah du nău ueh mpeh nău êng rnoi Rđe. Ba kơi tay gâp mbra kơt nti âk lơn gay ma gĭt n’hanh mât nău ueh êng aơ. Gâp mbra jă tay ăp băl gâp kơt nti nău ueh êng rnoi nơm đŏng”.

Nô Y-Rowel Hwing,Kruanh  Buôn Tu, xã Ea Tul, Đắk Lắk an gĭt, nghệ nhân H Bliư̆ Hwing lah du hê nuĭh ntoh ang tâm ntŭk rêh jêng mpeh nău ntĭm nti, mât rbăy nău ueh mprơ Eirei.

 “Ta Buôn Tu, bu ur nghệ nhân H Bliư̆ Hwing way geh ƀon lan dŭt rŏng, rnê nău mprơ eirei dŭt ueh n’hanh dŭt iăng. Wa mô dơn blău mprơ ma hôm nha nuĭh nsrôih âk tâm nău pah kan văn hóa ta ƀon n’hanh ta ntŭk. Ƀon lan way dŏng nău mprơ gay ma n’hao nuih n’hâm tâm kơl n’hanh ndrel đah ƀon lan tâm ƀon tâm ăp nău kan”.

Bol ma lĕ âk năm deh, sŏk lĕ mbra tĭng năm khay, yơn tâm măt uănh bâh nghệ nhân HBliư̆  Hwing hôm nha geh nău ŭch rŏng đah nău ueh êng. Wa way mĭn rvê mhâm ƀư ăp nău mprơ Eirei mô geh chuêl tâm nău rêh mhe aƀaơ, an kon său ba kơi tay geh hôm nha dơi djăt, geh mprơ n’hanh ryơk n’hao mpeh tu tơm bâh nơm. ăp tŏ mprơ, wa mô dơn nkoch du nău, ma hôm nha njoăl lĕ nău rŏng huêng khlăy, nău kahgĭt bâh ăp rơh nuĭh Rđe ta nău mprơ, nău đĭng năm.