Chum Show nsĭt tât du ndơ geh ƀư văn hóa mhe, mât dŏng săk tơm, ntĭt êng bah kon nuĭh n’hanh nkual neh Khánh Hòa. Ta nê, geh tâng jru lịch sử, văn hóa bah ƀon lan Chăm; nău jôn rbăn, rsang rnglay tâm văn hóa nuĭh Yuăn; ndrel nuih n’hâm uĕh lŏng, jŏ jong bah ăp rnoi nuĭh Tây Nguyên.

Tâm nău Chăm n’hanh du đêt nău ngơi ăp rnoi mpôl đê̆ ta Tây Nguyên, “Chum” lah nău ntĭt dêh bên bah nău tâm pă n’hanh nău tâm rnglăp tâm ƀon lan. đah rnoh jong bơi 60 mnĭt, “Chum Show” nkoch mpeh du njăr trong kon nuĭh joi tay tu tơm bah nău tâm rŏng n’hanh buăt nthoi. Nău nchih ƀư âk nuĭh djăt uănh âk tơ̆ ndrât ndal yor ăp nău nteh n’hanh rup gui nkre way bên nkre mha êng. Bên ta nău nteh chĭng gong, nău tâm râp njroh mprơ bah ƀon lan Chăm, Rđe, Raglai. Mha êng ta ntŭk lĕ rngôch dơi rlai lăp nsum tâm lơp chrêk ŭnh ang, kỹ thuật nchah bok, nchah yŭng yai mpăr mhe aƀaơ. 

Ma ăp rơh nchreng an uănh njroh mprơ nchah yŭng yai mpăr kalơ trôk, nkre đah âm nhạc, vũ đạo uĕh êng, nuĭh djăt uănh dơi rêh tâm ăp nuih n’hâm rhơn nđơr tâm ban nsum đah kăl e n’hanh mhe aƀaơ, đah săk nơm đah ăp nuĭh, đah trôk n’hanh neh. Wa Nguyễn Hồng Quang, ta phường Nha Trang, n’gor Khánh Hòa nklân năl:

“Nău nteh têh uĕh mhe aƀaơ, lơp chrêk ŭnh nkre tâm lăp nsum dŭt uĕh đah diễn viên geh ăp kô̆ păk ka dŏ njêng du măng ndâp mpơl. Ka dŏ uĕh mhe aƀaơ nkre đah xiếc, âm nhạc ƀon lan way ơm bah rnoi nuĭh Chăm, ăp rnoi nuĭh Tây Nguyên rlai lăp nsum tâm mông nar dja”.

Wa Ngô Thanh Phương, Nuĭh tơm leo ƀư Chum Show nkoch, ăp nuĭh ƀư măng njroh mprơ ŭch njêng măng njroh mprơ ơm tor lor, ntŭk nghệ sĩ n’hanh nuĭh gĭt blău ndrel nta trong dơh nsum. Ăp nău mprơ nkre đah nău rêh nuih n’hâm bah ƀon lan ta Tây Nguyên- Nam Trung Bộ, yơn dơi nkoch tay ma nău ngơi sân khấu mhe. Mât dŏng geh tâng jru văn hóa bah ăp rnoi nuĭh mbra kơl ăp ƀon lan gĭt wât, tâm pă âk lơn:

“Nău mpơl gĭt lor mpôl hên ŭch ăp nuĭh djăt uănh lăp tâm nău rêh Chum show dơi buăt nthoi, săm bah sôt khap nuih n’hâm; Joi sĭt mpeh tu tơm, nău mha êng bah săk he nơm. Chum tâm nău ngơi du đêt rnoi mpôl đê̆ lah nău tâm buăt nthoi, nău tâm rŏng n’hanh săm bah rngot ji tâm nuih n’hâm, rnôk ma ta ri trôk nar lơh, phŭt sial, tâm lơh tâm su tât rdôl rdăl”.

Lôch n’glăp dơn ngoăy ăp n’gor Tây Nguyên – Nam Trung Bộ, tâm bah ri aơ nơh n’gâng kan pâl nđaih nkual dja hun hao mbro. Đah Khánh Hòa, nău ŭch tât năm 2025 mbra wơt nklăp 15 rkeh tơ̆ năch, nsĭt geh rlău 60 rbăn rmen prăk. Pâl nđaih dơi n’gor Khánh Hòa lah bôk tơm bah jâng wăng sa ta ntŭk; n’hanh nkre pâl nđaih đah văn hóa lah trong rƀŏng hăn di.

Ăp bôk nău kan kơt “Chum Show” mô dơn ƀư âk mpưm tay nău rlong saơ bah năch, ma hôm n’hao rnoh khlay săk tơm, njêng trong dơh tâm rlong an ntŭk tât. Wa Trần Thị Kim Yến, Giám đốc Jay mprơ Đó lah rjăp, Khánh Hòa mô dơn geh “nău uĕh bah bri dak”, ma hôm geh âk mpưm văn hóa n’hanh blău njêng mhe, gay ăp tơ̆ hăn bah năch pâl nđaih jêng du njăr trong hăn uănh joi ăp tŏng geh nău gĭt:

“Nău mĭn bôk năp lah bôk nău kan nkre đah rup uĕh bah dŭt âk rnoi nuĭh ta n’gor. Năch dak bah dih dŭt nkah uĕh, ŭch ndơ geh ƀư dja. Yơn lah bah kơi nê ri nuĭh Yuăn he dŭt ŭch n’hanh tât uănh dŭt âk. Khân păng saơ mha êng ma way bên đŏng n’hanh saơ dŭt rhơn nđơr”./.