Lơ 21/8, UBND n’gor Gia Lai mbơh trong nchrăp ƀư tâm nău ƀư văn hóa, nghệ thuật, răm m’ak nkah gĭt 80 năm Cách mạng khay 8 n’hanh Quốc khánh 2/9. Lễ hội “Tinh hoa Đại ngàn-Biển xanh hội tụ” mbra ƀư măng 29/8 ta Quảng trường Nguyễn Tất Thành (phường Quy Nhơn), ndrel pănh pháo nkao dêh rnôk 9h30.

Măng 2/9, ta Quảng trường Đại Đoàn Kết (phường Pleiku) mbra pănh pháo nkao dêh jêh bôk nău ƀư nghệ thuật. Bah 29/8 tât 2/9, phường Quy Nhơn jêng ntŭk ntô lễ hội đah âk nău ƀư n’gŭr răm kơt lễ hội ŭnh ang, nar rgum văn hóa cà phê n’hanh chĭng gông Tây Nguyên, lễ hội ndơ ngêt sa hăn ndrel đah mpla nsơ ndơ OCOP n’hanh ƀon nău kan way ơm. Ta Quảng trường Chiến thắng mbra geh bôk nău ƀư nghệ thuật way ơm, lễ hội trong nkual ƀon têh ndrel âk nău ƀư nsum mpôl.