Ntơm pơk ngăn bâh lơ 28/8 n’hjanh jŏ tât lĕ lơ 5/9 ta Hà Nội, pla n’hơ nău dơi geh neh dak 80 năm njăr trong đăp mpăn, ueh lăng, hơm răm mbơh tơih nău dơi hun hao bâh neh dak tâm âk trong kan. Wa Tạ Quang Đông, Groi kruanh n’gâng kan văn hóa, thể thao n’hanh pâl nđaih lah na nê̆.

 “Aơ lah du rơh pla n’hơ me he geh mbơh tơih âk mpeh tup, kon nuĭh, neh dak Việt Nam, ăp nău dơi bâh Việt Nam đah băl mpôl lam ntur neh đah ƀon lan tâm dak ta rơh lơ 2/9 aơ. Aơ lah du ntŭk rgum nsu, du ntŭk tât mbra geh âk nuĭh ƀon lan Thủ đô ăp n’gor nkuăl ƀon têh sĭt tât ta aơ uănh pla n’hơ n’hanh aơ mbra lah nău trĕ lam nău dơi geh bâh neh dak bâh he nơm”.

Tât râng pla n’hơ lah 34 ndrơng ndơ pla n’hơ dŭt ueh, nsĭt nău ueh êng bâh 34 n’gor, nkuăl ƀon têh n’hanh ăp n’gâng kan ntŭk kan trung ương. Ngoăy tâm âk nău ntoh lư ueh êng bâh pla n’hơ lah  ntŭk pla n’hơ mpeh ndơ dŏng tahen, mpơl nău têh dăng bâh tahen ƀon lan Việt Nam. Thiếu tướng Tống Văn Thanh, Groi kruanh cục Tuyên huấn Tổng cục chính trị Quân đội nhân dân Việt Nam mbơh nău.

 “Ta aơ mpôl hên geh dŏng ăp công nghệ tâm nău pla n’hơ mbơh tơih nău kăl e n’hanh nău mhe aƀaơ, ngăn lah geh mbơh tơih ta nkual uănh bâh năch tât pâl rlưn , ntŭk aơ lah du nău dŭt ueh ngăn. Tal 2 lah tât râng pla n’hơ ta nkual bah dih đah bôk nău “thanh Gươm n’hanh ndơ nching”- đah rnoh neh rnâng kan leo kan pă an rlău 2ha. Ta aơ mpôl hên geh pă âk ntil ndơ mât rnă njrăng ngih dak, âk ntil ndơ phao blêu ndơ dŏng kan ueh mhe an ăp ntŭk kan, doanh nghiệp mât rnă njrăng mĭn ŭanh n’hanh hun hao”.

 Ta ntŭk kan Báo chí pla n’hơ “Nău dơi neh dak 80 năm njăr trong Đăp mpăn-ueh lăng-hơm răm”, wa Lê Hải Bình, groi kruanh  rnâng kan n’gâng kan Văn hóa, thể thao n’hanh pâl nđaih an gĭt:.

 “Ntŭk kan báo chí lah ntŭk mbra geh ƀư pă ăp nău kan gay ma kơl an ueh ngăn ăp nău pah kan bâh ăp phóng viên tâm n’hanh bah dih dak, tâm ban ƀư rklaih ăp nău tâm nău pah kan bâh ăp phóng viên. Đah nkô̆ kan kơt nĕ, mpôl hên mbra nta ăp nău dơh nơih an ăp phóng viên tâm dak n’hanh bah dih dak ndŏ mbơh nău mpeh pla n’hơ tâm ban kơt ăp đồng chí phóng viên mbra geh dơn nău mbơh ơm ngăn bâh ăp nău pah kan bâh rơh pla n’hơ”.

 Ta aơ lĕ geh ƀư ăp bôk nău kan nghệ thuật, rơh tâm mâp, tâm nchră, tâm nđur, tâm mbơh nău tă gĭt blău kan ueh. Pla n’hơ mô dơn lah nău kan chính trị-văn hóa khlăy ma hôm nha lah ntop nău rŏng mpôl rnoi, ndâk nsơm nău ŭch rdâk njêng neh dak têh ndrŏng. Aơ lah nău khlăy ngăn tâm nău pah kan vơt rhơn kahgĭt nar Cách mạng khay 8 n’hanh Quốc khánh lơ 2/9.