Ê lor geh ƀư kuăl brah, ndrel đah nchrăp ăp ntil ndơ kuăl brah, rnăk tơm mir jă lĕ rngôch bu ranh bu ur bu mom ndăm tâm ƀon gay ma ndrel kơl rnăk nơm tuch ba. Rnăk tơm mir nchrăp ăp ntil găr ntil kơt: ntil ba, mbo, rpŭng, rpoăl, blân, mbrăch..Mpeh ndơ kuăl brah, tĭng nău geh ta rnăk nơm ma mbra dơi ƀư kuăl brah ma sŭr mô lah djă r n’hanh ndrănh yăng. Nuĭh tâm ƀon tât kơl rĭ geh njôt nkre dĭng an găr ntil gay ma srĭh tuch.

Wa A Mĭn Nư ta xã Ea Wer, n’gor Đăk Lăk an gĭt, nău kuăl brah tuch ba lah du nău dŭt khlăy tâm nău rêh văn hóa bâh nuĭh Bunong, mpơl nău tâm rnglăp bâh lĕ ntŭk rêh jêng.

“Lôch kuaih su mpuĭh rĭ rnăk vâl mbra nchrăp tuch ba, năp lor lah nchrăp ntil ba an ueh, lôch nĕ mbơh đah ăp nuĭh ndrel tât kơl nơm tuch ba. Lôch geh ƀư kuăl brah rĭ bu klô rmul ba năp, bu ur tĭng ba kơi tuch tăm. Lôch du nar rmul tuch ta mir rĭ rnăk vâl ƀư piăng gay ma jă ăp nuĭh sa ndrel, ngêt ndrănh. Ăp rnăk ăp jay kơt nĕ da dê, uănh kơt lah tâm jă ti. Lôch rnôk bu dŭm rĭ hăn kăch ba geh tâm jă tăch ti kơt nĕ đŏng”

Ơm ôi ruk, tơm jay săch du ntŭk neh ueh lâng tâm mir, kuaih an ueh aih kloh gay ma ƀư ntŭk n’gân ndơ kuăl brah. Ta meng sah an âk ba ntil, lah ndrănh yăng lĕ geh tŏ bêng dak, du mblâm djăr lĕ lôch gŭch, du glah piăng m’êt, ndrel đah ndơ dŏng kơt kuk, kău, mâng rmul, khoeu mô lah dĭng an găr ntil. Nuĭh tơm jay ntơm ƀư kuăl brah. Nău kuăl brah geh mbơh tơih an brah yôk brah bri, brah mir, ŭch  brah an mih lăng prăng sơh, gay ma mbo ba săk lăy, mô geh đe geh kraih sa njơh mỉ ba an geh ueh jêng mbôn lăy. Lôch ƀư kuăl brah, nuĭh tơm jay ntơm sŏk găr ntil an ta dĭng nkar, ta khoeu, rmul n’hanh tuch ba. Lôch nĕ, ƀon lan tâm ƀon tât kơl nar nĕ mbra tuch ba kơi. Wa Amĭ Ly ta xã Ea Wer, n’gor Đăk Lăk an gĭt, nău kan aơ bâh nuĭh Bunong geh lĕ bâh jŏ hôm.

 ‘Ntơm kăl e nơh ƀon lan kanŭng knơm ta trôk nar, mô geh phân poh jêng nuĭh ƀon lan lôch ƀư neh mir kuaih ueh mir rĭ tuch ba ta mir klâp ma 2-3 năm, lôch ne lĕ sât rĭ bu nklơi hăn joi neh aơ gay ma tuch tăm tâm 3 năm n’hanh plŏ tay mir ơm, khân păng mô geh muĭh kăl bri mhe. Aƀaơ ta aơ lĕ geh tăm tuh, mbo, ba n’hanh tao, hôm nha rĭ ƀư ba lŏ dơm, ƀon lan lĕ hun hao ngăn hôm, ƀư tĭng nău ntŭnh bâh ngih dak mô geh muĭh kăl bri, yơn ma nău way kuăl brah ê lor tuch tăm khân păng hôm ƀư đŏng, di đah nău way kăl e”.

Lôch du nar pah kan o r’ah ta mir ba, lĕ ma tơm rnăk n’hanh ăp nuĭh mbra ndrel ngêt sông n’hanh tât râng ăp nău kan pâl rlưn, ngêt sông, njrơh mprơ, mpơl nău tâm rnglăp tâm kơl ndrel. Aƀaơ, ăp năm ta ăp ƀon bâh nuĭh Bunong way geh ƀư tĭng nău way ta bôk yan tuch tăm lah kuăl brah, gay ma mpơl nău lah ueh đah huêng brah lĕ ntrŭnh an khân păng du yan mbôn lăy.