Ơi kônh wa n’hanh băl mpô! Nklang ƀon lan ƀư mir jan ban ngăn, ăp băl mom rnoi Xơ Đăng kơt A Huyền (ta Quảng Ngãi) n’hanh A Bliêt (n’gor Dak Lak) gân djăng đah rklă ƀư, njêng mhe n’hanh nđơn trêng nti tay ndơ uh goh nău mprơ way ơm. Ntơm bah đơn T’rưng n’gloh bah năp mpông jay tât dĭng dưt rla uĕh êng, khân păng mât ndray kơt ơm, nkre rgâl mhe gay nău nteh dơ uh goh nău mprơ rnoi nuĭh he rlai lăp nsum tâm nău rêh mhe aƀaơ- nthoi tay tu tơm văn hóa u che he ma mpang ti n’hanh bôk rngok gĭt blăy he nơm.

Mô knŭng gơih ma nau ntĭm nti đơn t’rưng, chĭng gong ndrel nau mprơ Xơ đăng ân rơh mom tâm ƀon lan, nô A Huyền tâm Đắc Tô n’gor Quảng Ngãi ndrel nô A Bliêt tâm xã Tân Tiến, n’gor Dak Lak hôm leo âm nhạc ơm bah Tây Nguyên hao tâm mạng xã hội kơt lah Facebok, Zalo... đah khân păng, mạng lah ntŭk pơk hvi gay nkoch mbơh ăp ntil âm nhạc, ƀư rêng nau ŭch nau ơm yau ueh bah rnoi mpôl ndrel mpoh nau rhơn ueh ân nau m’ak aơ tâm nuih n’hâm nŭih djăt, ngăn lah rơh mom:

Tâm ăp rnôk jêng dŭt pơh, A Huyền ntĭm kon se tâm ƀon nkrêh đơn tơrưng, mpât mprơ Xơ Đăng da dê. Nô hôm hăn ndrel nghệ sĩ Đinh Xuân Đề (ca sĩ Đoàn Nghệ thuật n’gor Kon Tum ơm) trêng nti tay, rdâk bôk nău kan njroh mprơ an kon se ta ăp xã, kơl ăp kon se nsing nơm tâm rlong ta ntŭk pâl têh. Chông ŭnh hit răm mbro tâm nuih n’hâm nghệ sĩ A Huyền, nđơn tay nău nđơr tât kônh wa ƀon lan:

“Nău lôk ƀư, nchreng an uănh ndơ uh goh rnoi nuĭh he nơm ri rnăk wâl, kônh wa, tât ăp kon său tâm ƀon dŭt ŭch n’grŏ tĭng n’hanh ntroh n’gôr. Mô dơn êng kônh wa nuĭh Xơ Đăng, lĕ ma oh nô nuĭh Yuăn, leo oh kon he hăn tât djăt n’hanh kơt nti tŭr goh chĭng gong, nkrêh đơn tơrưng đŏng. Uănh nsum lah rnăk dŭt n’grŏ tĭng gâp mpeh trong ƀư ndơ uh goh nău mprơ way ơm. Yor, săk gâp nơm tâm ban kơt rnăk wâl, kônh wa tâm ƀon ŭch rŏng dơi mât ndray, ntik n’hao săk tơm văn hoá way ơm, jêh aơ tay mô an geh roh hêng đŏng”.

Hôm nô A Bliêt ta buôn Kon wang, xã Tân Tiến, Đăk Lăk ri njêng bar rmôt chĭng gong – mpât mprơ an ăp kon se, râng âk nar kan têh kơt Lễ hội cà phê Buôn Ma Thuột, Lễ hội sầu riêng nkuâl Krông Pắc… nô nchih rgum, rdâk ƀư ăp nău nchih kơt “Ndrău djăr”, “Nău nteh chĭng gong ƀon oh” geh nkhôm rnê âk tâm ăp rơh tâm rlong ta n’gor đŏng. 2 nuĭh kon bah nô nthoi tay nău way ơm mpât mprơ rnoi he nơm bah rnăk wâl:

“Tâm 2 rmôt chĭng gong geh 28 nuĭh, tâm nê geh 2 hê kon gâp râng. Aƀaơ geh kon ndăm dôl nti năm tâl 2 nhih nti Cao đẳng Văn hoá Nghệ thuật Dak Lak, kon nti way mpeh nhạc cụ piano, bah meng nê păng hôm nti tay ăp ndơ uh goh nău mprơ rnoi nuĭh he nơm đŏng”.

Rnôk mạng internet hun hao, Nghệ nhân A Huyền n’hanh A Bliêt hŏ ndăn dŏng ăp jâng nsing mbrô kơt Facebook, Zalo…, gay tâm pă nău gân djăng, rêng nău nđơr mpeh nău tâm rŏng ndơ uh goh nău mprơ tât rơh kơn druh ndăm.  Nghệ nhân A Huyền an gĭt:

“Nău ŭch ndơ ndơ̆ uh goh nău mprơ way ơm lăp tâm ăp trang mạng xã hội lah gay an âk nuĭh gĭt mpeh nău nteh bah bri neh têh hvi, nău nteh bah ăp ndơ uh goh way ơm Tây Nguyên. Gâp dŭt rhơn, yor geh nău tam, wăch rgum âk nuĭh like. Lah ma ngăn, gay ăp ndơ geh ƀư bah gâp uh goh way ơm n’glăp ta mạng xã hội ri ân geh tay ndơ năp dŏng, máy móc gay rhôp năp, gay n’glăp đŏng. Ân rgŏ jă ăp kon se, ăp mon său rgum njroh mprơ... ri clip mbra wăch rgum âk nuĭh djăt uănh lơn. Tâm bah ri  aơ nơh, tă bah ăp băl quay clip tĭng nău ŭch ndal, chŭp du đêt nău mprơ tă bah gâp nchreng an uănh, lôch nê oh nô n’glăp ta trang mạng xã hội. Bu uănh saơ uĕh, saơ geh nkô̆ hôr uĕh ri khân păng ŭch dŭt âk, săk gâp nơm rhơn ngăn rnôk n’glăp ăp clip tă bah gâp nơm mprơ”.

Ndrel nsum nău rhơn đah nău n’glăp rup gui n’hanh ăp ndơ geh ƀư an nău mprơ way ơm bah he ta mạng xã hội, nô A Bliêt nkoch:

“Gâp hŏ n’glăp ăp rup gui ăp nău goh mprơ tơ-rưng, nău chĭng gong, mpât mprơ, rup ndăch rvăch… ta ăp trang mạng xã hội. Yơn lah, tă bah aƀaơ mô hên mô hŏ geh ndơ way dŏng gay rhôp jêng mô hŏ n’glăp ta mạng xã hội âk. Gâp mpŏng bơi tât, rnôk tăch ndơ ndơ uh goh ma gâp lôk ƀư, mô lah hăn nchreng an uănh lah tŏng geh prăk gâp mbra rvăt máy way rhôp rup gay mât ndray ăp nău uh goh, nău chĭng gong, mpât mprơ, ndăch rvăh lăp ta ăp trang mạng xã hội đah nău ŭch gay nkơnh n’hơ văn hoá way ơm rnoi nuĭh Xơ Đăng tât nuĭh uănh uănh, băl mpôl ta ăp nkual”.