Ndrel đah nuĭh djăt lam dak, ƀon lan ăp rnoi mpôl đêt ta Tây Nguyên rhơn răm 4rƀŏng đah Ƀư nkah gĭt 80 năm nar ndâk njêng Radio Nău ngơi Việt Nam (7/9/1945-7/9/2025). Rlet rlău 80 năm, Radio Nău ngơi Việt Nam lĕ jêng nuĭh bên, dăch dêh đah ƀon lan Tây Nguyên. Mô knŭng djôt tât ăp nău mhe, ăp nău mprơ, chĭng gông, djăt ăp bôk nău ntuh bah Radio TNVN, hôm kơl kônh wa gĭt tay tuch tăm, mât rong, mât njrăng bri, mât nău way ơm uĕh lăng... Knơm nĕ, kônh wa janh hao ndâk njêng nău rêh hơm răm, uĕh lăng. Kônh wa ăp rnoi mpôl đêt Tây Nguyên uănh Radio kơt nuĭh băn bên bah nơm. Bu ranh ƀon Y Thanh 68 năm, (xă H’Ra, n’gor Gia Lai) rhơn nkoch:

Tă bah Radio ma săk nơm dơi djăt bâr Tuyên ngôn Độc Lập bah Wa Hồ tâm năm 1945. Ngăn ngên rngot! Knơm Radio ma lơ 30/4/1975, nuĭh ƀon lan dơi gĭt Miền Nam lĕ dơi rklaih đăp mpăn. Rnôk nĕ mpôl hên ta nkual căn cứ, rnôk dơi gĭt nău mbơh aơ lĕ ƀon lan, rhơn răm... Tal 2 tay lah gâp dơi djăt Radio Nău ngơi Việt Nam geh nău ngơi Bana, Jarai, Xơ Đăng n’ahnh du đêt nău ngơi rnoi mpôl đêt êng... Gâp dŭt răm rnôk nău ngơi me deh dơi mât, pơk tâm nău ngơi. Radio hôm ntĭm an kônh wa mât rong, tuch tăm, ndâk njêng nău rêh mhe.... Săk gâp nơm ƀa ƀơ djăt jêh nĕ nkoch mbơh tay an kônh wa ăp nău uĕh djăt bah Radio.