Trau pai jêr n’hanh blău lah nău mô dơi mô geh tâm nău rêh ndơ sông sa bah nuĭh Xơ Đăng, ngăn lah tâm ăp rơh lễ têh. Wa Y Num, ta ƀon Ea Mao, xă Tân Tiến (Đắk Lắk) nkoch:

Lor rnôk ƀư tâm nsông nsao, tâm wăng an kon sau, lĕ rnăk wâl, oh nô, mpôl băl ndrel ty rgop soan. Nuĭh ri hăn sreh ju bri, nuĭh hăn joi ƀang, nuĭh ji nsŭng, nuĭh hăn sreh dĭng nkar... Ăp nuĭh geh nău kan, jêh nĕ ndrel nkret gâm, gŭch n’ông. Nău way ơm aơ lĕ geh bah u che n’hanh tât aƀaơ dơi mât ndrăy.

Bah ăp ndơ geh ơm tâm bri kơt tơm ju, ntô tơm kreng, tơm khoăr, tơm rba..., nuĭh Xơ Đăng ƀư jêng trau pai ƀô kah ngăn, tăng ƀăl, rnih dŭt uĕh. Wa Y Koh, ta ƀon Cư Drăng, an gĭt, ndơ sa ntôn dơh yơn lŏ boăt nthoi bah âk rơh kơn, dŭt uĕh. Du glah trau pai mô knŭng sơm nuih, hơm ndŭl, ma hôm răm nuih n’hâm, yor ƀô kah nĕ dơi uănh đah nău tâm rŏng n’hanh nău krêp dêh.

Gay gâm geh trau pai ƀô kah, mpôl hên săch phe kah ta mir yôk, peh đah mpăl si. Tâm rnôk nĕ, kônh wa hăn tâm bri joi tơm ju, plôk ntô, juh hăch đah buh bah ntô tơm khoăr, tơm kreng... Rnôk geh tŏng ăp ndơ, mư ntơm gâm. Tơm ju juh hăch an lor bôk năp, rnôk sĭn mư an rnih, wâr tâm ban gay mô rchoăl, jêh nĕ ntop poăch, ka mô lah nting tĭng ŭch. Lah geh poăch ngi ri wâr ngi an kah, jêh nĕ mư an tay dak, gôl ju bri, n’gleh dŭt lah rnih phe.

Wa Y Rum, ndrel ta ƀon Cư Đrăng, xă Tân Tiến (Đắk Lắk) an gĭt tay:

Gay trau pai ƀô kah ri jêh rnôk trăm phe ba mir âk mông, he mô kĭn đah măy ma an peh i ty đah mpăl, trau mư krêp, njŭng dak, an gâm dak lor rnôk rđŏk mư an poăch mô lah nting, trau ntơm rđŏk ri mư an mbrơi mbrơi rnih tâm glah trau, trau mbra kah, mô ô̆.

Ndơ lơh glah trau pai gôl ju bri bah nuĭh Xơ Đăng lŏ uĕh kah ? Wa Y Hrưp, ta ƀon Kon Wang, xă Tân Tiến (Đắk Lắk) rblang:

Ndơ tâm bri dŭt kloh, mô geh dak si tu ndrŭng, mô geh hóa chất. Sa tra bri, play bri kônh wa đăp mpăn. Ŭch dơi mât rih kah nĕ, nău bôk năp lah mô phah bri. Rnôk pĕ ri pĕ tŏng khăp, gay tơm si hôm e uĕh nđĭr, yan bah kơi he lŏ geh biăp play kloh, đăp mpăn.

Mô knŭng lah ndơ sa ăp nar, trau pai gôl ju hôm rgop geh tâm ăp rơh rnăk wâl geh nău khlay, kơt wơt bu năch, tâm ôp, tâm nsông, lôch năm oh bê, lăp jay mhe... wa A Jon, ta ƀon Čư Drăng, xă Tân Tiến (Đắk Lắk), nkoch:

Tâm nar tâm wăng nar aơ, kon sau, oh nô, mpôl băl rgum sĭt tŏng ăp. Du hê du ty, ndrel gâm trau pai n’hanh âk ndơ sa way ơm. Yor nar răm, yor nău tâm rnglăp, mpôl hên ndrel soan gay n’gôn piăng ntop kah bô yôk bri Tây Nguyên.

Tâm jay jêt, ŭnh nar hâng, tĭng rlŭ trau pai n’hôl dơi ndơ̆ tât ty nuĭh ranh, kon se jêt. Nteh ngơi gơm n’gŭr răm, tâm rnglăp ndrel ƀô kah uĕh nđik bah yôk bri. Ăp rlŭ trau pai mô knŭng ƀư răm nuih n’hâm, hơm ndŭl, ma hôm njuăl nău rŏng, nău tâm pă n’hanh tâm rnglăp bah ƀon lan.